Qazaq halqyna, kórshilerime rızamyn - «Altyn alqa» ıegeri
L.Berezınanyń aıtýynsha, ózi 1942 jyly, soǵys naǵyz qyzyp turǵan ýaqytta Ájen aýylynda dúnıege kelipti.
Bul kezde Stalıngrad maıdany tıip turǵandyqtan, Batys Qazaqstannyń Orda (Bókeı ordasy) men Jánibek aýdandary soǵys jaǵdaıynda dep jarııalandy. Sol qıyn-qystaý ýaqytta qanshama jan týysqandarynan aıyryldy.
Týǵan ata-anasynan alty aıynda jetim qalǵan ony Saıqyndaǵy temirjolda brıgadır bolyp jumys jasaıtyn Gavrııl Lanınniń otbasy asyrap alady. Sábı súıý baqyty buıyrmaǵan Lanınder Lıýdmılany jalǵyz qyzymyz dep, «qanattyǵa qaqtyrmaı, tumsyqtyǵa shoqyttyrmaı» ósiredi. Ózi de áýeli temirjolda, keıin poshtashy bolyp qyzmet etedi.
1962 jyly súıikti jary Vladımırmen bas qosyp, keıin alty ul, bir qyzdyń anasy, 13 nemere-jıenniń ájesi atandy.
«Vladımırmen 28 jyl otastym. Ómirden erte ketti marqum. Keńes odaǵy tarap jatqan ýaqyt edi. Jeti balamen qalǵan maǵan ońaı bolǵan joq. Mine, osy kezde barlyq kórshilerim qolushyn sozyp, demedi. Olardyń bárine rızashylyǵym sheksiz. Toqsanynshy jyldardyń qıyndyqtary da artta qaldy», -deıdi ómir boıy Saıqynnan taban aýdarmaǵan, 2015 jyly «Altyn alqa» ıegeri atanǵan Lıýdmıla Berezına.
Qazirgi kezde balalarynyń bári ómirden óz oryndaryn tapty. Qyzy Marııa Reseıdiń Volgograd oblysynyń Voljsk qalasynda, uldary Mıhaıl, Alekseı, Vladımır Ahtýba (Astrahan oblysy) men Máskeý qalalarynda turyp jatyr. Saıqynda turatyn Andreı Bókeı ordasy kolledjinde, kelini Tatıana qoǵamdyq densaýlyq saqtaý bóliminde, ıÝrıı men Borısi temirjolda qyzmet atqarady. ıÝrıımen bas qosqan kelini Ásel janarmaı beketinde.
«Endi Borısime adal sút emgen kelin tap bolsa eken dep armandaımyn. Qazaqtarmen de qanymyz aralasyp, qudandaly bolǵandyqtan, kórmesek, tura almaımyz. Barlyq qýanysh-qyzyǵymyzdy bólisip kelemiz», - deıdi L.Berezına.
Qudaı qosqan kórshileri Kánıta Bektileýova men Baqytjamal Erekeshevamen L.Berezınanyń aǵaıyn-týystaı bolyp ketkenine jarty ǵasyrǵa jýyqtady. Onyń balalaryn baǵysyp, qanattanyp ketýine kómektesken de osyndaı aqpeıil jandar edi.
«Qazir jaǵdaı jaqsy. Burynǵydaı otyn jaqpaımyz. Elektr qýaty, sý óz aldyna, gaz kelip tur. Osydan artyq ne kerek, eń bastysy, elimizde tynyshtyq bolsyn. Qudaıym soǵysty kórsetpesin. Kópbalaly otbasylarǵa, muqtaj jandarǵa qoldaý kórsetip otyrǵan Elbasymyzǵa úlken alǵysymdy aıtamyn. Bereke-birligimiz arta bersin, denimiz saý bolsyn»,- dep túıindedi sózin L.Berezına.
