Qazaq halqy úshin et asýǵa daıynbyz - Sochı meri
ASTANA. QazAqparat - Sochı qalasynyń meri Anatolıı Pahomov qazaqstandyqtardy Qara teńizdiń jaǵasynda demalýǵa shaqyrdy.
«Sizderdi Sochıge qýana shaqyramyz. Eki el arasynda vızalyq rejım joq, tipti, til úırenýdiń qajeti joq, taǵamdarymyz da uqsas. Árıne, biz et aspaımyz. Biraq, qazaq halqy úshin et asyp, ulttyq taǵamdaryńyzdy jasaýǵa úırenýge ázirmiz», - dedi A.Pahomov.
Qala meri atap ótkendeı, Sochı beıtarap qala, munda kelgen týrıst jaǵajaı, taý men shańǵy, konkı sporty, hokkeı men at sportynan bastap, kóńil-kúıine saı demalýdyń san jolyn taba alady. Sondaı-aq, A.Pahomov shıpajaı men kýrorttaǵy emdeý sharalaryn barynsha arzan baǵaǵa usynatyn «Ashyq ońtústik» atty baǵdarlama týraly qulaǵdar etti.
Esterińizge sala keteıik, buǵan deıin habarlaǵanymyzdaı, 2016 jyldyń maýsym aıynan bastap Astana jáne Almaty qalalarynan Sochıge aptasyna bir ret tikeleı áýe reısi ashylady.
