Qazaq halqynyń qıyn sáttegi kómegin árdaıym este saqtaımyz — ázerbaıjan tilshisi

ASTANA. KAZINFORM — Aqtaý mańyndaǵy ushaq apatynan eki ushqysh mert boldy. Ókinishke qaraı, ekeýi de ázerbaıjan azamaty. 

Egjeı-tegjeıin Jibek Joly arnasynyń efırinde Azerbaıjan Qoǵamdyq telearnasynyń jýrnalısi ári júrgizýshisi Mýrad Gýseınov aıtyp berdi.

— Aldymen qazaqstandyq tarapqa alǵys aıtam. Ushaq apatynan keıin jaqyn jerdegi adamdar birinshi bolyp kómekke keldi. Zardap shekken jandardy qutqarǵan barlyq qyzmet pen dárigerlerge úlken raqmet. Sizdiń materıalyńyzda adamdardyń qıyn jaǵdaıǵa kómekke asyǵyp, qan tapsyryp jatqanyn bildim. Bul Ázerbaıjan men Qazaqstan arasyndaǵy baılanystyń qanshalyqty myǵym ekendigin bildiredi. Bul eki halyqtyń berik jáne shynaıy dostyǵynyń dáleli, — dedi Mýrad Gýseınov efır kezinde.

Sondaı–aq, ázerbaıjan tilshisi eki el kóshbasshysynyń tyǵyz baılanysta ekenin atap ótti.

— Bizdiń kóshbasshylarymyz Ázerbaıjan prezıdenti Ilham Álıev pen Qazaqstan Prezıdenti Qasym-Jomart Toqaev arasyndaǵy turaqty dıalog pen tyǵyz qarym-qatynasty erekshe atap ótý qajet. Olardyń ózara is-qımyly tótenshe jaǵdaıda ǵana emes, eki el arasyndaǵy seriktestik qatynastyń keń aýqymyn qamtıdy, — deıdi ol.

Ázerbaıjandyq áriptesimiz, qorytyndylaı kele, qaıǵyǵa ortaqtasyp qan tapsyrǵan jáne Qazaqstandaǵy Ázerbaıjan elshiligi aldynda gúl shoǵyn qoıǵan qazaqstandyqtarǵa alǵysyn aıtty. 

— Ázerbaıjan halqy baýyrlastyq qoldaýdy eshqashan umytpaıdy jáne qıyn sátte kórsetilgen qazaq halqynyń kómegin árdaıym este saqtaıdy, — deıdi baýyrlas áriptes.

Aıta keteıik, aldyn ala aqparat boıynsha Aqtaý mańyndaǵy ushaq apatynan tiri qalǵan qazaqstandyqtar joq.