Qazaq halqy japondyq tutqyndarǵa shynaıy janashyrlyq tanytty – Elshi Djýn ıAmada
ASTANA. KAZINFORM – Qazaqstandaǵy Japonııanyń Tótenshe jáne Ókiletti Elshisi Djýn ıAmada HH ǵasyrdaǵy qazaq-japon tarıhyna toqtalyp, qazaqstandyqtarǵa sheksiz alǵysyn bildirdi.
«Bizge ortaq taǵy bir tarıhı oqıǵa – stalındik GÝLAG qorqynyshy. Ekinshi dúnıejúzilik soǵystan keıin qylmystyq rejım halyqaralyq quqyq normalaryna qarsy Qıyr Shyǵystyń túkpir-túkpirinen 600 myńǵa jýyq japon azamatyn urlap áketip, atyshýly kontslagerlerde májbúrlep jumysqa saldy. Solardyń 60 myńy, shamamen 10%-y Qazaqstanǵa ákelindi. Biraq, munda bir ǵajap boldy. 4 mln adamnyń ómirin qıǵan asharshylyq kezinde, adam aıtqysyz qasiret pen azapty bastan ótkergen qazaq halqy shynaıy janashyrlyq tanytty. Japon tutqyndarynyń synaqtan aman ótýine áý bastan-aq qoldan kelgenniń bárin jasady», - dedi Djýn ıAmada Astanada Japonııanyń 126-y Uly Mártebeli Imperatory Narýhıtonyń 64 jasqa tolǵan týǵan kúnine oraı ótken saltanatty sharada.
Japon elshisiniń aıtýynsha, qazaq halqynyń janashyrlyq kómeginiń arqasynda ólim-jitim 2% shamasynda bolǵan. Bul Keńes Odaǵynyń basqa ólkelerindegi jaǵdaıdan 10-15%-ǵa tómen.
«Osy múmkindikti paıdalana otyryp, búkil álem tarıhynyń eń zulmat ýaqytynda asyl adamgershiligi úshin qazaq halqyna alǵys aıtamyn. Ótken jyly naýryzda Astanada eki elge ortaq ıadrolyq synaq týraly bolashaq urpaqqa jetkizý maqsatynda jańa memorıal salyndy. Sondaı-aq, bılik organdarynyń nátıjeli uıymdastyrýy men atsalysýynyń arqasynda japondyq mamandar delegatsııasy Shyǵys Qazaqstanda 14 japondyq tutqynnyń súıegin taýyp, elge qaıtardy. Osy oraıda Qazaqstan Úkimetine, ShQO jáne Rıdder ákimdigine túsinistik tanytyp, qoldaý bildirgeni úshin sheksiz alǵys aıtamyn», - deıdi Elshi myrza.
Aıta ketsek, Qazaqstandaǵy Japonııanyń Tótenshe jáne Ókiletti Elshisi Djýn ıAmada eki eldiń ekonomıka, bıznes jáne ekologııa salasynda aıtarlyqtaı nátıjege qol jetkenin málim etti.
Odan bólek, Qazaqstandaǵy japon elshisi eki ulttyń uqsastyǵyn erekshe atap ótti.
Óz kezeginde elimizdiń Ónerkásip jáne qurylys vıtse-mınıstri Azamat Beıisbekov atalǵan eldiń Qazaqstannyń mańyzdy ári senimdi seriktesi ekenin aıtty.