Qazaq gýmanıtarlyq zań ýnıversıtetinde halyqqa qyzmet kórsetý ortalyǵy ashylady
ASTANA. QazAqparat - Búgin Qazaqstan Respýblıkasynyń Bilim jáne Ǵylym Mınıstri A.B.Sárinjipovtiń qatysýymen Qazaq gýmanıtarlyq zań ýnıversıtetinde Halyqqa qyzmet kórsetý ortalyǵy ashylady, dep habarlaıdy oqý ornynyń baspasóz qyzmetinen.
Bul Qazaqstandaǵy osyndaı alǵashqy mekeme bolmaq. Mundaı mekemeler Germanııada, Ulybrıtanııada jáne Nıderlandta keńinen taraǵan. Árbir sheteldik JOO-da osyndaı qurylym bar, olarda klıentterge belsendi qyzmet kórsetiledi.
QazGZÝ-diń Halyqqa qyzmet kórsetý ortalyǵynyń basty maqsaty - bir tereze prıntsıpi boıynsha stýdentterge jalpy sany 40 jýyq sapaly jáne jedel qyzmet kórsetý. Stýdentterge, magıstranttarǵa, doktoranttarǵa, talapkerlerge jáne olardyń ata-analaryna qujattar qabyldaý, oqýǵa túsý, oqýdan shyǵý, aýysý, bilim alýdaǵy ózgerister, jataqhanaǵa ornalasý t.b. qajetti máseleleri boıynsha qyzmet kórsetiledi.
Sondaı-aq, munda Astana qalasynyń turǵyndaryna zań, ekonomıka, psıhologııa máseleleri boıynsha tegin keńes berý ortalyǵy óz jumysyn bastaıdy. Osy sharalar JOO-nyń servıstik qyzmet kórsetýin ońtaılandyrý úshin jasalǵan, bul ásirese ýnıversıtet stýdentterine qajetti aqparatty bir jerden alýǵa múmkindik beredi.
HQKO qyzmetkerlerine qoıylatyn basty talap - sypaılyq, yqylastylyq, izgi nıettilik. Basqa da halyqqa qyzmet kórsetý ortalyqtaryndaǵydaı personalǵa daýys berý arqyly baǵa beriledi, ol stýdentterge qyzmet kórsetýdiń sapasyn arttyrady. Bir stýdentke qyzmet kórsetýdiń ýaqyty - 15 mınýt. Osy ýaqyt ishinde qyzmetker qajetti qujattardy, ótinishti qabyldap, basqa bólimderge kelisimge jiberedi.
Ótinish 3 jumys kúni ishinde qarastyrylady, sodan keıin stýdentke ótinishiniń oryndalý barysy týraly sms-habarlama jiberiledi. Aldaǵy ýaqytta stýdentter ótinishterin elektrondy túrde bere alýy úshin QazGZÝ-diń Halyqqa qyzmet kórsetý ortalyǵyn elektrondy Úkimet baǵdarlamasyna qosý josparlanǵan.
Bolashaqta elimizdiń barlyq joǵary oqý oryndarynda osyndaı ortalyqtar ashý kózdelip otyr.
