Qazaq gýmanıtarlyq-zań ýnıversıtetinde akademık Salyq Zımanovqa arnalǵan dárishana ashyldy
ASTANA. 6 qazan. QazAqparat - Búgin Astanadaǵy Qazaq gýmanıtarlyq-zań ýnıversıtetiniń bas oqý ǵımaratynda kórnekti qoǵam qaıratkeri, zań ǵylymdarynyń doktory, professor, Qazaqstan Respýblıkasynyń Ulttyq ǵylym akademııasynyń akademıgi Salyq Zımanovqa arnalǵan dárishananyń ashylý saltanaty ótti.
«Búgin akademıktiń atymen atalatyn dárishanany ashyp otyrmyz. Bizdiń muǵalimder jáne men ózim Salyq Zımanovtyń dáristerin myńdap, tálim alǵanbyz. Bizdiń oqý ornynda sol kisiniń shákirtteri barshylyq. Osy oraıda akademıktiń atyndaǵy dárishananyń arnaıy ashylýy óte oryndy dep esepteımiz», -dedi Qazaqstan gýmanıtarlyq-zań ýnıversıtetiniń prezıdenti Maqsut Nárikbaev
S.Zımanov Táýelsiz Qazaqstannyń Konstıtýtsııasyn ázirleýge atsalysqan zańger. Ol Ata Zańymyzdyń árbir baby men tarmaǵynyń demokratııalyq ustanymdarǵa sáıkes bolýyna basa nazar aýdardy. Elge syıly, halqyna qadirli azamattyń júrip ótken ómir joly - óskeleń jastarǵa úlgi. «Ǵylym sardary» atanǵan akademık S.Zımanov qazaq ǵylymyn bıik beleske kótergen ǵalym. Onyń qalamynan shyqqan memleket tarıhy men quqyq salasyna qatysty, saıası jáne quqyqtyq júıe tarıhy, konstıtýtsııalyq quqyq, memlekettik quqyq jáne saıasattaný ǵylymdary boıynsha zerttegen eńbekteri myńdaǵan mamannyń ómirden durys jol tabýyna sebep boldy. Kórnekti ǵalym, ulaǵatty ustaz S.Zımanov Ulttyq ǵylym akademııasyndaǵy quqyqtaný ǵylymyn uıymdastyrýshy retinde tanymal.
Memleket jáne qoǵam qaıratkeri Salyq Zımanov 1921 jyly aqpannyń 19-ynda dúnıege kelgen. Soǵysqa deıin muǵalim bolyp eńbek etken ol 1940 jyly ásker qataryna shaqyrylady. Polktiń shtab bastyǵy bolǵan gvardııa maıory Salyq Zımanov maıdandaǵy erlik joly úshin І jáne ІІ dárejeli Otan soǵysy, «Qyzyl juldyz» ordenderimen, «Kavkaz qorǵanysy úshin» medalimen marapattalǵan.
Qoǵam qaıratkeri S.Zımanuly soǵystan keıin Búkilodaqtyq zań ınstıtýtynyń Qazan fılıalyn jáne KSRO Ǵylym Akademııasynyń Memleket jáne quqyq ınstıtýtynyń aspırantýrasyn támamdady. Ol 200-den asa ǵylymı jumystyń avtory, onyń 12-si monografııa, Memleket tarıhy jáne Keńestik Qazaqstannyń quqy atty úshtomdyq basylymnyń avtory, ári jetekshisi.
