«Qazaq» gazetiniń 100 jyldyǵyna arnalǵan dóńgelek ústel otyrysy ótti

ASTANA. 14 aqpan. QazAqparat - Ulttyń baspasóz tarıhynda, mádenıeti men ádebıetinde, rýhanııatynda úlken ról atqarǵan, alash muratyn kóterýde ózindik erekshe jol salǵan «Qazaq» gazetiniń shyqqanyna bıylǵy 2 aqpanda 100 jyl toldy.

Osyǵan oraı búgin Astana qalalyq Tilderdi damytý basqarmasy «Rýhanııat» ortalyǵymen birlesip «Qazaq» gazetiniń 100 jyldyǵyna arnalǵan dóńgelek ústel otyrysyn ótkizdi.

Jıynnyń maqsaty - HH ǵasyr basyndaǵy Alash zııalylarynyń kótergen dúnıelerine búgingi qoǵamnyń kózqarasymen qarap, qazirgi zamanǵy ózekti máselelerdi talqylaý, pikir almasý.

«Jalpy HH ǵasyr basyndaǵy alash zııalylarynyń negizgi ıdeıalyq ortalyǵy, aqyl-oıynyń uıasy, sondaı-aq jalpy qazaq sanasynyń oıanyp, júregin dúr silkindirýge úlken túrtki bolǵan «Qazaq» gazetiniń tarıhy, taǵylym-tájirıbesi búgingi tańda da asa ózekti. Toqtala ketetin jaıt, ár ǵasyr basynda memleketter tarıhynda kóptegen uqsastyqtar oryn alyp jatatyny ras. Sol turǵydan alǵanda kezinde «Qazaq» gazetiniń betinde kóterilip, ulystarǵa úlken oı salǵan máseleler áli ózegin joıǵan joq. Endeshe sol jyldary qoǵamǵa qozǵaý salǵan máselelerge nazar aýdarý mańyzdy», - deıdi jıyn barysynda sóz sóılegen L.Gýmılev atyndaǵy Eý­ra­zııa ulttyq ýnıversıtetiniń jýrna­lıs­tıka fakýltetiniń dekany Qaırat Saq.

Jıynǵa alashtanýshy ǵalymdar, Májilis depýtattary, tarıhshylar qatysty.