«Qazaq gaz óńdeý zaýyty» JShS eks dırektory iri mólsherde aqsha jymqyrǵany úshin 4 jylǵa sottaldy

JAŃAÓZEN. KAZINFORM – Mańǵystaý oblysy Jańaózen qalasynyń soty «Qazaq gaz óńdeý zaýyty» JShS burynǵy dırektory B.A. Baıshýaqovqa qatysty úkim shyǵardy. Bul týraly Antıkor málim etti.

Memleket basshysynyń tapsyrmasyn oryndaý maqsatynda Sybaılas jemqorlyqqa qarsy is-qımyl agenttigi qoǵamda zańdylyq pen tártip qaǵıdatyn qamtamasyz etý, sondaı-aq sybaılas jemqorlyq faktileriniń jolyn kesý jónindegi jumysty jalǵastyryp otyr. 

«Qazaq gaz óńdeý zaýyty» JShS burynǵy dırektory B. A. Baıshýaqovqa qatysty úkim shyqty. Baıshýaqov kásiporynnyń senip tapsyrylǵan múlkin aýktsıon ótkizbesten zańsyz satý jáne túsken qarajatty ıemdený arqyly iri mólsherde jymqyrǵany úshin kináli dep tanyldy. 

— Ol 4 jylǵa bas bostandyǵynan aıyryldy jáne ómir boıy memlekettik qyzmette jáne kvazımemlekettik sektor sýbektilerinde qyzmet atqarý quqyǵynan aıyryldy. Sot aktisi zańdy kúshine engen joq, — delingen habarlamada.

Buǵan deıin habarlanǵandaı, «Elge kómek» qaıyrymdylyq qorynyń jetekshisi ustaldy.