Qazaq ǵalymdary úshin Ózbekstan arhıvine jol ashylýy tıis - Berik Ábdiǵalıuly
ASTANA. QazAqparat - 2018 jyly Qazaqstandaǵy Ózbekstan jyly aıasynda qazaq ǵalymdaryna Ózbekstan arhıvinde jumys isteýge jol ashylýy tıis. Bul týraly belgili qoǵam qaıratkeri, saıasattanýshy Berik Ábdiǵalıuly aıtty, dep habarlaıdy QazAqparat tilshisi.
«Tarıhqa kelsek, qazaq pen ózbektiń bir halyq ekenin bilemiz. Kezinde handyqtary bólingen shyǵar, biraq halqy bir. Ókinishke qaraı, táýelsizdik alǵan jyldary eki el arasynda bolmaıtyn básekelestik týyndap ketti. Tarıhqa baılanysty jáne basqa da kóptegen ortaq máseleler qordalanyp qaldy. Máselen, gýmanıtarlyq salada ortaq tarıhymyz bar, ortaq ádebıetimiz bar. Osy jaǵynan zertteý jumystary kóleńkede qaldy. Ózbekstan arhıvteri biz úshin áli jabyq. 1916-1917, 1920 jyldary bolǵan oqıǵalar áli de zertteýdi qajet etedi. Sondyqtan, Qazaqstandaǵy Ózbekstan jylynda gýmanıtarlyq, ádebıet, mádenıet salasyndaǵy yntymaqtastyqtan úlken úmit kútemiz. Ǵalymdarǵa arhıvpen jumys isteýge jol ashylýy tıis», - dedi qoǵam qaıratkeri QazAqparat tilshisine bergen pikirinde.
B. Ábdiǵalıulynyń aıtýynsha, jahandaný zamanynda qazaqqa jaqyn noǵaı, qaraqalpaq, ózbek, qyrǵyz halyqtary bir-birine qoldaý kórsetýi tıis.
«Ózbekstan úshin Qazaqstan - úlken naryq. Buǵan deıin shekaradan ónimderdi ótkizýde qıyndyqtar boldy. Endi shekarany ashyp, ekonomıkalyq yntymaqtastyqtar ornar bolsa, birqatar baǵalar tómendeýi múmkin. Árıne, bul ońtústiktegi sharýalar úshin aýyr tııýi múmkin. Degenmen, básekelestik bolsa, sapa da bolady, erte kóktemde kókónister anaǵurlym arzandar edi. Biz shyǵaratyn taýarlar úshin de Ózbekstannyń 30 mıllıon halqy jańa naryq bolar edi. Osylaısha, tarıh, mádenıet, ádebıet, ekonomıkalyq turǵyda eki eldiń yntymaqtastyǵy artar edi», - dep óz sózin túıindedi B. Ábdiǵalıuly.
Aıta keteıik, 2018 jyly Qazaqstandaǵy Ózbekstan jyly ótedi. Búgin Ózbekstan prezıdenti Shavkat Mırzıeev Qazaqstan Prezıdenti Nursultan Nazarbaevtyń shaqyrtýymen Astanaǵa jumys saparymen keldi.
