Qazaq ǵalymy qaterli isikti emdeýdiń jańa tásilin ázirlep jatyr
ASTANA. KAZINFORM – Nazarbaev ýnıversıtetiniń PhD doktoranty Sanazar Qadyr ishek jáne toq ishek qaterli isigin emdeýge arnalǵan jańa tásildi zerttep jatyr. Oǵan saı, dári nanobólshekter arqyly qaterli isik paıda bolǵan aımaqqa tikeleı jetkiziledi. Zertteýdiń maqsaty – preparattyń áserin isikke baǵyttap, saý jasýshalarǵa túsetin zııandy azaıtý, dedi ol Jibek Joly arnasyna bergen suhbatynda.
Qazir onkologııalyq aýrýlardy emdeýde hımıoterapııa keńinen qoldanylady. Alaıda onyń ereksheligi – dári qaterli jasýshalarmen qatar saý jasýshalarǵa da áser etýi múmkin. Osy máseleni eskere otyryp, ǵalymdar preparatty isik ornalasqan aımaqqa barynsha dál jetkizetin tásilderdi zerttep keledi.
Sanazar Qadyr usynǵan júıede dári arnaıy quramǵa engizilip, aǵzaǵa túskennen keıin gelge aınalýy kerek. Zertteýshiniń aıtýynsha, preparat qalypty temperatýrada suıyq kúıde bolady. Al dene temperatýrasynyń áserinen gelge aınalyp, ishekte belgili bir ýaqyt saqtalady. Osy aralyqta dári qaterli isikke áser etýi tıis.
– Qazir zertteýimiz zerthanalyq kezeńinde. Іshek jáne toq ishekten alynǵan qaterli isik jasýshalaryna ózimizdiń júıemizdi qoldanyp, onyń áserin zerttep jatyrmyz. Kelesi kezeńde júıeni janýarlarǵa, ıaǵnı tyshqandarǵa synaýdy josparlap otyrmyz. Odan keıingi zertteýdiń nátıjesine qaraı klınıkalyq kezeńge ótý kózdeledi, – dedi Sanazar Qadyr.
Onyń aıtýynsha, jańa tásildi hımıoterapııany almastyratyn daıyn em retinde qarastyrýǵa áli erte. Degenmen zertteý sátti jalǵassa, preparatty isikke baǵyttap jetkizý arqyly onkologııalyq aýrýlardy emdeýdiń jańa múmkindikteri ashylýy yqtımal.
Jas ǵalym bolashaqta zertteý aıasyn keńeıtýdi de josparlap otyr. Ol analyq bez obyry men as qorytý júıesinde paıda bolatyn qaterli isikterge qarsy preparat ázirlemek.
Nazarbaev ýnıversıtetiniń zerthana qyzmetkeri Myrzageldi Seıitkerim mundaı ǵylymı izdenisterdi qoldaýdyń mańyzyn atap ótti.
– Sanazar óte kúrdeli zertteýmen aınalysyp jatyr. Qaterli isikpen kúres álem medıtsınasy úshin áli de ózekti. Sondyqtan osyndaı jas ǵalymdarǵa qoldaý kórsetip, ǵylymdy birge damytýymyz kerek dep oılaımyn, – dedi ol.
Qaterli isikke qarsy jańa em ázirleý uzaq zertteýdi jáne birneshe synaq kezeńinen ótýdi talap etedi. Sanazar Qadyrdyń jobasynyń kelesi kezeńdegi nátıjesi jańa tásildiń tıimdiligi men qaýipsizdigin baǵalaýǵa múmkindik beredi.
Buǵan deıin Astanadaǵy Ulttyq ǵylymı onkologııa ortalyǵynda Ortalyq Azııada alǵash ret protondyq terapııaǵa arnalǵan jabdyq ornatylǵany týraly jazǵan edik.
