Qazaq ǵalymdary selen metalyn baıytý arqyly 15 mln dollar tabys ákelgen

ASTANA. KAZINFORM — Qazaqstandyq ǵalymdardyń ádisimen tazartylǵan selennen jylyna 15 mln dollar kiris túsedi. Ǵylym jáne joǵary bilim mınıstri Saıasat Nurbek tazartylǵan selenniń úlgisin jýrnalısterge tanystyrdy.

«Bizdiń Qanysh Sátpaev ýnıversıtetiniń bazasyndaǵy ken baıytý jáne metallýrgııa ınstıtýty birneshe jyldar boıy selen degen sırek metaldy baıytýdyń jańa ádistemesin pysyqtaǵan. Alty jyldaı eki úlken nysanalyq grant boıynsha jumys istegen. Aldyńǵy jyly biz Ken baıytý ınstıtýtyna naqty tapsyrma berdik. „Endi teorııalyq turǵyda jasaǵan ádistemeńizdi naqty qoldanbaly formatqa aýystyryńyz“ dedik. Olar bir jyldyń ishinde arnaıy peshti jasap shyqty. Bul — myrysh, mys sııaqty metaldardyń balqytýdan shyqqan qaldyq. Onyń ishinde qorǵasyn, altyn jáne selen bar. Las selenniń bir kelisi naryqta 10-12 dollar turady. Bizdiń ǵalymdardyń ádisimen osy selen 99,5 deıtin tazalyq kórsetkishimen rafınadtaldy. Bir jaqsy jeri, reagentsiz. Qazir osylaı tazartylǵan selenniń bir kelisi 150 dollar turady. Osylaı ǵalymdarymyz kásiporynnyń kiris kózin 15 ese ulǵaıtty», — dedi Saıasat Nurbek.

Sondaı-aq, ol byltyr tamyzda osy jobaǵa arnap Balqash mys zaýytynda eksperımentaldy tseh ashylǵanyn eske saldy.

«Endi jylyna 100 tonnadaı tazartylǵan selen shyǵaramyz. Bul — 15 mln dollardaı taza kiris degen sóz», — dedi mınıstr.