Qazaq fýtbolynyń ardageri Seıitjan Baıshaqov ómirden ozdy
ASTANA. QazAqparat - 16 aqpan kúni qazaq fýtbolynyń ardageri, KSRO sport sheberi Seıitjan Berikbaıuly Baıshaqov 72-ge qaraǵan shaǵynda dúnıeden ozdy.
60-jyldardaǵy áıgili fýtbolshy, qazaq aıaqdobynyń ardageri uzaq aýrýdan keıin qaıtys boldy.
«Egde býyn Seıitjan Berikbaıulynyń sheberligine, soqqan goldaryna tánti bolatyn. Fýtbol jankúıerleri ony tipti KSRO-nyń ataqty fýtbolshysy Edýard Streltsovpen salystyrdy. Ókinishke qaraı, Seıitjan Berikbaıuly óz boıyndaǵy talantyn tolyqtaı júzege asyra almaǵan sekildi. Bul turǵyda, qazaq sport jýrnalıstıkasynyń ardageri Saıyn Tursynov aǵamyz «ár túrli sebeptermen Seıitjan óz qabileti men áleýetiniń jartysyn da júzege asyra almady» dep ókinip otyratyn. KSRO quramasy sapyna shaqyrtylǵanyn da talaı ret jyrlap bergen... Ári Seıitjan Baıshaqovtyń Almatynyń Ortalyq stadıonda Máskeý klýbtary sapynda oınaıtyn KSRO quramasynyń qorǵaýshylaryn qalaı aldap ótkenderin súısine aıtyp otyratyn. 60-jyldardaǵy jankúıerlerdiń birazyna Seıtjan Baıshaqovtaı shabýylshy joq bolatyn», - dep jazady Astana fýtbol federatsııasy.
Qazirgi Qazaqstan fýtbol federatsııasynyń prezıdenti, 1978 jylǵy álem chempıonatynyń elektik dodasynda KSRO quramasy sapynda eki oıyn ótkizgen, dańqty qorǵaýshymyz Seıildá Baıshaqov ta nemere aǵasynyń Jambyl jastary úlgi tutar tulǵa bolǵanyn aıtady: «Aǵam Seıitjan Jambyldyń «Metallıst» komandasy sapynda oınap, shabýyl shebinde óner kórsetti. Al 1967 jyly ony «Qaırat» shaqyrdy. Sol jyldary Seıitjan Baıshaqov jalǵyz meniń ǵana emes, myńdaǵan jambyldyq jetkinshekter úlgi tutar fýtbolshysy boldy. Osydan keıin meniń de armanym - «Qaırattyń» jeıdesin kııý boldy», - deıdi ol.
Qazaqstan fýtbol federatsııasynyń ujymy KSRO sport sheberi, qazaq fýtbolynyń ardageri Seıitjan Berikbaıuly Baıshaqovtyń qaıtys bolýyna baılanysty onyń týystary men jaqyndaryna kóńil aıtty.
Avtory: Alpamys Israıl. Esik bilim-ınnovatsııa lıtseıi
Foto Álim Anapıanovtyń jeke muraǵatynan
