Qazaq fýtbolynyń qazirgi deńgeıi qandaı

ASTANA. KAZINFORM - Búgin fýtboldan Premer-lıga komandalary arasyndaǵy Qazaqstan birinshiliginiń alǵashqy týry máresine jetti. Bıyl 33-márte jalaýyn kótergen dop dodasy naýryz jáne qarasha aralyǵynda bolady.

El birinshiliginde «Aqtóbe», «Astana», «Atyraý», «Elimaı» (Semeı), «Jeńis» (Astana), «Jetisý» (Taldyqorǵan), «Qaırat» (Almaty), «Qaısar» (Qyzylorda), «Qyzyljar» (Petropavl), «Ordabasy» (Shymkent), «Tobyl» (Qostanaı), «Turan» (Túrkistan) jáne «Shahter» (Qaraǵandy) sekildi 13 komanda baq synaıdy.

Jańa maýsymǵa qazaqstandyq komandalar joǵary deńgeıde daıyndaldy. Birikken Arab Ámirligi, Túrkııa jerinde oqý-jattyǵý jıynyn ótkizip qaıtty. Kóptegen klýbtarmen joldastyq kezdesý ótkizdi. Ótken jylǵy quramyn saqtaǵany da bar, jańadan tájirıbeli fýtbolshylardy qosqany da bar. Árbir komanda óziniń qarjylyq múmkindigine baılanysty oıynshylardy quramyna qosa aldy.

Bas júldege úmitkerler kóp

Jankúıerler arasynda qaı komanda chempıon bolady degen saýal jıi qoıylyp otyr. Árıne, osy oraıda elimizdiń alty dúrkin chempıony «Astana» ujymy aldymen aıtylady. Odan keıin byltyr óz tarıhynda tuńǵysh márte jeńis tuǵyryna kóterilgen «Ordabasy» oıǵa oralady. Al bes márte altynnan alqa taqqan «Aqtóbeni» de eshkim joqqa shyǵara almaıdy. Basty báseke atalǵan úsh komandanyń arasynda júrýi múmkin. Oǵan qosa jergilikti jastarǵa erekshe mán berip júrgen «Qaırat» ta bıyl altyn medalge úmitker retinde aıtylyp keledi. Alǵashqy týrda atalǵan tórt komanda da súringen joq. Dese de dop dodasynyń endi bastalǵanyn eskersek, ázirge naqty sheshim aıta almaımyz. Sondaı-aq, «Tobyl», «Elimaı» klýbtary bıyl júldeli oryndardan úmitker retinde sanalyp otyr. Bul ujymdar qataryna tájirıbeli oıynshylardy qosty. Endigi kezekte olardyń aldynda dop dodasy barysynda jınaqy oınaı bilý mindeti tur. Jalpy alǵanda, joǵaryda atalǵan klýbtar kezinde chempıon atanyp, júldegerler qatarynan kóringen. Sondyqtan jankúıerler olardan joǵary bıikten kórinýdi qalaıdy.

Byltyr týrnır kestesinde orta tusynan kóringen «Qyzyljar», «Qaısar», «Atyraý», «Jetisý» azýly qarsylastaryna laıyqty qarsylyq kórsete alady degen pikir bar. Al «Jeńis», «Turan», «Shahter» de eshkimge ońaı shaǵylatyn jańǵaq emes.

«Ras, komanda quramyna qaraı otyryp «Astana» men «Ordabasy» aldymen aıtylady. Oǵan qosa «Aqtóbe» men «Qaırat» ta bas júldeden úmitker ekenin bildirip keledi. Sondyqtan atalǵan ujymdardyń arasynan tartysty básekeni kútemin. Árıne, birinshilik barysynda árbir komandanyń jeńiske degen jigerli qımylyn kórgimiz keledi», – deıdi sport jýrnalısi Shalqar Esten.

Qazirge deıin el chempıony ataǵyna barlyǵy 10 komanda qol jetkizdi. Olardyń arasynan elordalyq «Astana» 7 márte jeńimpaz tuǵyryna kóterilse, Pavlodardyń «Ertis» jáne «Aqtóbe» – 5, almatylyq «Qaırat», semeılik «Elimaı», elordalyq «Jeńis» – 3, Qostanaıdyń «Tobyly» men Qaraǵandynyń «Shahteri» – 2, «Taraz» 1 márte altyn medal aldy.

«Ordabasy» alǵash ret chempıon atandy. Shymkenttik klýb buǵan deıin 2017, 2019 jyldarda qola júldege qol jetkizdi.

Stadıon máselesi qashan sheshiledi ?

Keıingi jyldarda Qazaqstan fýtbol federatsııasy tarapynan komandalar oıyn kórsetetin stadıondarǵa qoıylatyn talap kúsheıip keledi. Ókinishtisi, keıbir klýbtar bul talapqa laıyqty jaýap bere almaı otyr.

Elordadaǵy «Astana-arena» stadıonynyń ýaqytsha jabylýyna baılanysty «Astana» komandasy bıyl Almaty qalasynda ornalasqan «Han táńiri» stadıonynda oınaıtyn boldy. Sondaı-aq, «Jeńis», «Elimaı», «Aqsý» óz alańyndaǵy kezdesýin Pavlodardaǵy ortalyq stadıonda qabyldaýǵa májbúr.

Qýanyshtysy, keıingi jyldarda elimizde stadıon salýǵa baılanysty jaǵymdy jańalyqtar aıtyla bastady. Shymkent qalasynda 35 myń adamǵa arnalǵan sońǵy úlgidegi stadıon boı kóteredi degen áńgime bar. Al Qyzylordada 7 myń jankúıer emin-erkin syıatyn stadıonnyń alǵashqy qazyǵy qaǵylýda. Osydan úsh-tórt jyldaı buryn Túrkistanda fýtbolǵa arnalǵan arena el ıgiligine berildi. Bul – qýantarlyq jaǵdaı.

Dese de uzaq jyldar boıy elimizde jańa stadıonnyń salynbaýy oılantady. Osy oraıda jaǵdaıy shamalas Ózbekstan, Ázerbaıjan elderinde osyndaı qanshama sporttyq ǵımarattardyń boı kótergenin bilemiz. Endigi kezekte sol olqylyqtyń ornyn toltyryp, jankúıerlerge barlyq jaǵdaı jasalǵan fýtbol arenalary paıdalanýǵa beriledi degen senimdemiz.

Jańa jobalar júzege asady

2024 jyldyń 28 aqpan kúni Qazaqstan kásipqoı fýtbol lıgasynyń jańa brendiniń tanystyrylymy men jańa maýsymynyń tusaýkeseri ótti. Fýtbol salasyndaǵy mamandar men BAQ ókilderine Lıganyń jańa ataýy – QFL (Qazaqstan Football League), jańartylǵan logotıp jáne «Fýtbolmen birge» (fýtbolmen birge) urany tanystyryldy. Aýqymdy is-shara elordamyzdaǵy QR Prezıdenttik ortalyǵynda uıymdastyryldy.

«Bizdiń lıgamen birlesken jumysymyz fýtbol bıznes ındýstrııasyn qurýǵa baǵyttalǵan, onda fýtbol - demeýshiler men ınvestorlar úshin qyzyǵarlyq aktıv, halyq úshin áleýmettik mańyzy bar ónim jáne halyqaralyq deńgeıde memleket úshin maqtanysh bolýy kerek. Búgingi tańda lıga óziniń aldynda turǵan mindetterdi oryndaýǵa jáne strategııanyń barlyq tarmaqtaryn júzege asyrýǵa qaýqarly. Bul shynaıy jáne qol jetkizýge bolatyn maqsattar», - dedi Qazaqstan fýtbol federatsııasynyń prezıdenti Ádilet Bármenqulov.

Bıyl elimizde fýtboldy damytýǵa baǵyttalǵan birqatar joba usynyldy. Jobalar nebári 9 aıda ázirlendi. Olardyń keıbireýi elimizde buryn-sońdy bolmaǵan. Mysaly, Lıga kýbogy jáne Áıelder lıgasy syndy jańa týrnırler júzege asady. Birinshi týrnırge 16 otandyq klýb qatysady, olar tek bedeldi kýbok úshin ǵana emes, sonymen qatar otandyq fýtbol tarıhyndaǵy eń iri júlde qoryn da sarapqa salady. Bul 1 mıllıon AQSh dollaryn quraıdy. Sondaı-aq, Áıelder lıgasynyń ashylýyna erekshe nazar aýdaryldy, onda elimizdiń 5 óńirinen 6 klýb ózderiniń qatysatyndyǵyn rastady.