Qazaq fılmderi mıllıardtaǵan kassa jınady

ALMATY. KAZINFORM — 2024 jyl otandyq kınoóndirýshiler úshin tabysty bolmaq. Bıyl prokatqa otandyq 90 kıno prokatqa shyqty. Bul týraly XVII «Eýrazııa» halyqaralyq kınofestıvaliniń resmı baspasóz konferentsııasy barysynda akter, kınotanýshy, «Eýrazııa» kınofestıvaliniń shtab jetekshisi Kárim Qadyrbaev aıtty.

Spıkerdiń sózinshe, 2024 jyly otandyq kıno rekordtyq kórsetkishterge qol jetkizdi.

«Bıyl qazaqstandyq 90 fılm ulttyq prokatqa shyqty, bul rekordtyq kórsetkish. Byltyr 60 kıno bolǵan. Bul kartınalar sany bir jarym ese ósti degen sóz. Kassadan túsken túsimder aıtarlyqtaı, osy jyly alty fılm mıllıard teńgeden astam kassa jınady. Sońǵylarynyń biri — Zamanback fılmi. Biz jeke kınoóndiris kompanııalarynda talantty, belsendi jastar bar ekenin kórip otyrmyz. Budan bólek, veb-serıaldardyń da sany artqan. Bul keremet. Qazaq kınosy jan-jaqty damyp, san alýan janr paıda bolyp jatyr dep oılaımyn. Eger buryn tek komedııalar basym bolsa, qazir kınoteatrlarda kórermenderdi jınaıtyn dramalar men qorqynyshty fılmder shyǵyp jatqanyn kórip otyrmyz», — dedi ol.

Sháken Aımanov atyndaǵy «Qazaqfılm» ulttyq kınostýdııasy prezıdentiniń mindetin atqarýshy dırektory Aıdar Omarov kınojobalardy qarjylandyrylýy týraly aıtty.

«Biz kınoprokatqa jeke ınvestıtsııalardyń basym ekenin baıqap otyrmyz. Bul kınoındýstrııada oń dınamıka bar ekenin kórsetedi. Kásipkerler bul salaǵa ınvestıtsııa salýǵa daıyn, ıaǵnı kınoındýstrııa jumys istep, dıvıdend ákelip jatyr», — dep qosty Aıdar Omarov.

Eske salaıyq, halyqaralyq «Eýrazııa» kınofestıvali 2024 jyldyń 24-30 qarasha aralyǵynda Almatyda ótedi. Festıvalge 15-ten astam el qatysady.

Kınofestıvaldiń tolyq baǵdarlamasymen silteme arqyly tanysa alasyz.