Qazaq fılmi San Sebastıan kınofestıvaliniń konkýrstyq baǵdarlamasyna ótti
«Bask eliniń» bul festıvali - «A» klasyndaǵy eń kóne kınofestıvalderdiń biri.
Ol Eýropadaǵy Kann, Berlın, Venetsııadan keıingi tórtinshi mańyzdy jáne ıspan tilinde sóıleıtin álemdegi eń mańyzdy jıyn sanalady.
Festıval búkil álem boıynsha kórnekti talanttardy izdeýmen jáne jyl saıyn jańa esimderdi ashýmen tanymal.
«Baýyryna salý» kartınasy qazaqtyń baıyrǵy dástúri boıynsha ájesiniń tárbıesindegi balanyń ómirin baıandaıdy.
Ájesi ómirden ozǵannan keıin ol ata-anasyna oralyp, jańa ortada beıtanys adamdarmen qarym-qatynas ornatýy kerek.
Fılmniń stsenarııin jazǵan Ashat Kýchınchırekovtyń aıtýynsha, bul kartına - qazaq halqynyń salt-dástúrine degen qurmet.
«Óz basymnan ótken oqıǵa. Men ájemniń qolynda óstim, ol meni ósirdi. Biraq bul jerde eń bastysy - ata-anamen qarym-qatynas. Ájesimen birge ósken balalar ata-anasyn «áke», «ana» dep atamaıdy. Nelikten? Balalar tastap ketkeni úshin ata-anasyna renjıdi. Fılmniń dramasy sol, eski otbasynan aıyrylǵan keıipker áli de jańasyn taba alady», - deıdi rejısser.
«Ashat Kýchınchırekov otbasyndaǵy, eń aldymen, áke men bala arasyndaǵy qarym-qatynasty óte talantty túsirgen, «baýyryna salý» dástúri Ortalyq Azııa aımaǵynda bolǵanyna qaramastan, búkil álem boıynshp túsinikti jáne kórermenge jaqyn bolyp shyqty. Munyń jarqyn dáleli - San Sebastıan festıvaline qatysý», - deıdi fılmniń prodıýseri Anna Kachko.
Kópshilikke Sergeı Dvortsevoıdyń «Tıýlpan» fılmindegi basty róli arqyly tanylǵan Ashat Kýchınchırekov (2008 jyly Kann kınofestıvalinde «Erekshe kózqaras» baıqaýynyń bas júldesiniń ıegeri) óziniń debıýt fılmin úsh jyl boıy jasady.
Túsirilim Almaty oblysyndaǵy Quıǵan jáne Tuıyq aýyldarynda júrgizildi.
Qoıýshy-operator - Janarbek Eleýbek.
Basty róldi akter Ersultan Ermanov somdady.
71-shi San Sebastıan halyqaralyq kınofestıvali 2023 jyldyń 22-30 qyrkúıeginde ótedi.