Qazaq fermeri túıe sharýashylyǵyn damytyp, jylyna 197 tonna sút óndiredi – sheteldegi qazaq baspasózi

Qytaıda qazaq fermeri 12 túıeni myń basqa deıin jetkizdi – Harajorga

Shyńjań ólkesiniń Býryltoǵaı aýdany Qaramaǵaı qalashyǵy, Oıqora qystaǵynda turatyn qazaq fermeri Ómirbek Mysyrqan 11 jylda 12 túıeden bastalǵan sharýashylyǵyn myń basqa deıin ulǵaıtyp, jylyna 197 tonna túıe sútin óndirýge qol jetkizdi. Jyldyq tabysy 4,6 mln ıýanǵa jetken, dep habarlaıdy Harajorga aqparattyq portaly. 

Jergilikti BAQ-tyń habarlaýynsha, fermer maldy kútip-baptaý, jemshóppen qamtamasyz etý jáne sút óndirý úderisine zamanaýı tehnologııalardy engizip, sharýashylyq jumysyn ǵylymı negizde uıymdastyrǵan.

2018 jyly «Vanıýan» bıotehnologııalyq kompanııasynyń qoldaýymen saýyndy túıeleriniń sanyn 60-qa jetkizip, otbasylyq fermasyn tirkegen. Búginde sharýashylyq jergilikti turǵyndardy jumyspen qamtyp, on adamǵa túıe ósirý tájirıbesin úıretip otyr. Aldaǵy ýaqytta fermer ǵylymı zertteýler men jańa tehnologııalardy paıdalanyp, túıe sútiniń ónimdiligi men sapasyn arttyrýdy kózdeıdi. Jergilikti kompanııa joǵary oqý oryndarymen birlesip, saýyndy túıelerden tórt jylda úsh ret tól alýǵa múmkindik beretin tehnologııany zerttep jatyr.

Sarapshy: AQSh ınvestıtsııasy Ortalyq Azııadaǵy reformalardyń ornyn basa almaıdy– Eurasia Today

Amerıkalyq ınvestıtsııalar Ortalyq Azııa elderine jańa ekonomıkalyq múmkindikter ashqanymen, óńirdegi ishki reformalardyń ornyn basa almaıdy. Bul týraly Iorktaýn ınstıtýty janyndaǵy Turan Research Center zertteýshisi Rafael Sattarov Exclusive.kz basylymyna bergen suhbatynda málimdedi, dep habarlaıdy Qyrǵyzstanda shyǵatyn Eurasia Today aqparat agenttigi. 

Sarapshynyń pikirinshe, AQSh-tyń Ortalyq Azııaǵa qyzyǵýshylyǵy óńir elderiniń egemendigin saqtaý, strategııalyq mıneraldar men sırek jer metaldaryna qol jetkizý, sondaı-aq Qytaı men Reseı yqpalyn teńgerý maqsattarymen baılanysty. Degenmen mıllıardtaǵan dollarlyq kelisimder naqty ınvestıtsııaǵa aınalýy úshin Qazaqstan, Ózbekstan jáne basqa da memleketter logıstıka, energetıka, ınvestıtsııalyq ahýal men vızalyq saıasat baǵyttarynda ózara yntymaqtastyqty kúsheıtýi qajet.

Sattarov strategııalyq resýrstardy tek shıkizat kúıinde eksporttamaı, jergilikti jerde óńdeý, birlesken kásiporyndar qurý jáne mamandar daıarlaý jóninde kelisimder jasaý mańyzdy ekenin atap ótti. Onyń aıtýynsha, C5+1 formaty aıasyndaǵy óńirlik yntymaqtastyqtyń nátıjesi eń aldymen Ortalyq Azııa basshylarynyń ortaq sheshimderdi is júzinde júzege asyrýǵa daıyndyǵyna baılanysty.

Ózbek jazýshysy Nobel syılyǵynyń yqtımal úmitkerleri qatarynda ataldy– ÓzA

Ózbekstandyq jazýshy ári aqyn Hamıd Ismaılov 2026 jylǵy ádebıet salasyndaǵy Nobel syılyǵynyń yqtımal úmitkerleri tizimine endi, dep jazady «ÓzA». 

Ózbekstandyq BAQ-tyń habarlaýynsha, qalamgerdiń shyǵarmalary aǵylshyn, orys, túrik, nemis jáne frantsýz tilderine aýdarylǵan. Onyń «Jyndar keshi» («Jınlar bazmı») romany 2019 jyly Eýropa qaıta qurý jáne damý bankiniń ádebı syılyǵyn ıelengen.

1954 jyly Qyrǵyzstannyń Toqmaq qalasynda dúnıege kelip, keıinnen Tashkentte joǵary bilim alǵan jazýshy 1992 jyldan beri Londonda turyp, shyǵarmashylyqpen aınalysady.

Nobel qorynyń erejesine sáıkes, syılyqqa usynylǵan tulǵalar týraly málimetter 50 jyl boıy qupııa saqtalady. Sondyqtan Hamıd Ismaılovtyń bıylǵy syılyqqa usynylǵany týraly aqparatty resmı rastalǵan derek emes, yqtımal úmitkerler tizimine qatysty habar retinde qarastyrǵan jón. Aıta keteıik, 2026 jylǵy ádebıet salasyndaǵy Nobel syılyǵy 8 qazanda kanadalyq aqyn ári jazýshy Enn Karsonǵa berildi.

Qytaı men Ortalyq Azııa arasyndaǵy týrıstik almasý artyp keledi – Halyq gazeti

Qytaıdyń memleket merekesindegi uzaq demalys pen vızasyz rejımge qatysty túrli sharalardyń engizilýi arqasynda Ortalyq Azııa qytaılyq týrıster úshin tanymal saıahat baǵytyna aınaldy, dep habarlaıdy Halyq gazeti basylymy. 

Halyq gazetiniń málimetinshe, 2025 jylǵy 1 maýsymda Qytaı men Ózbekstan arasyndaǵy vızasyz rejım kúshine engennen keıin qytaılyq týrıster sany 3,5 esege artqan. Qazaqstan da Qytaı azamattary arasynda tanymal baǵytqa aınalǵan.

Sonymen qatar Qytaıǵa baratyn Ortalyq Azııa elderiniń týrısteri de kóbeıgen. Gýanchjoýdaǵy Baııýn áýejaıynyń deregine sáıkes, 2026 jylǵy 2 maýsymdaǵy jaǵdaı boıynsha, Ortalyq Azııanyń bes elinen kelgen saıahatshylar sany 90 myńnan asyp, ótken jyldyń sáıkes kezeńimen salystyrǵanda 286,6%-ǵa ósken. Onyń ishinde Qazaqstannan kelgender sany 258,4%, Ózbekstannan 351,9%, Qyrǵyzstannan 660,6% artqan.

«Ǵylym ordasynda» Iran mádenıetine arnalǵan kórme ótti – ParsToday

2026 jylǵy 6 qazanda Almatydaǵy «Ǵylym ordasynda» Qazaqstan men Iran arasyndaǵy mádenı-gýmanıtarlyq baılanystardy damytý jáne Iran mádenıetin nasıhattaý maqsatynda «Tegeran kúnine» arnalǵan is-shara ótti, dep jazdy ırandyq ParsToday aqparat agenttigi. 

Atalǵan BAQ-tyń málimetinshe, shara aıasynda Tegeran qalasynyń tarıhy, mádenıeti, zamanaýı kelbeti men kórikti jerlerin tanystyratyn fotokórme jáne beınerolıkter usynyldy.

Sondaı-aq Ortalyq ǵylymı kitaphananyń qorynan parsy tilindegi qoljazbalar men Irannyń tarıhy, ádebıeti, óneri jáne sáýletine arnalǵan kitaptar kórmesi uıymdastyryldy. Kelýshiler Irannyń mádenı murasy men Tegeran qalasyna qatysty qundy basylymdarmen tanysty.

Sondaı-aq osy aptada ParsToday basylymynda «Ál-Farabı atyndaǵy QazUÝ-da «Kitap oqıtyn ult» jobasy aıasynda kezdesý ótti» degen taqyryptaǵy aqparat jaryq kórdi. 

Irandyq basylymnyń keltirgen deregine súıensek, Ál-Farabı atyndaǵy Qazaq ulttyq ýnıversıtetiniń shyǵystaný fakýltetinde «Kitap oqıtyn ult» jobasy aıasynda jas aýdarmashy Shyńǵys Ábdiraıymmen kezdesý ótti. «ParsToday»-diń málimetinshe, 5 qazanda uıymdastyrylǵan sharada «Otbasy hrestomatııasy» baspasynyń qyzmetkeri stýdentterge jańa basylymdar men aýdarma jumystary týraly baıandady.

Sońǵy jyldary baspadan ırantaný bóliminiń stýdentteri parsy tilinen tikeleı aýdarǵan Hýshang Mýradı Kermanıiniń «Bala Májıttiń hıkaıalary» jáne fakýltet doktoranty Gaýhar Omarhanova aýdarǵan Mehdı Mırazımıdiń «Bir bettik kitap» shyǵarmasynyń birinshi jáne ekinshi kitaptary jaryq kórgen.

Kezdesýdiń maqsaty – stýdentterdiń kitap oqý mádenıetin qalyptastyrý, synı oılaý jáne shyǵarmalardy taldaý qabiletin damytý. Shara barysynda baspanyń kitap tańdaý ólshemderi men aýdarma ádisteri talqylanyp, qatysýshylar suraqtaryna jaýap aldy.

Jasandy ıntellekt adamdarǵa tapsyrma berip, aqy tóleı bastaıdy – TRT

Búginde jasandy ıntellekt tehnologııalary qoǵamda keńinen talqylanyp jatqan negizgi taqyryptardyń birine aınaldy.

Jasandy ıntellekt adamzatty baqylaýyna ala ma nemese órkenıetke qaýip tóndire me? Ázirge bul suraqtyń naqty jaýaby joq. Degenmen bul tehnologııalardyń qarqyndy damyp, kúndelikti ómirdiń ajyramas bóligine aınalyp kele jatqany anyq.

AQSh-ta jasandy ıntellekt júıeleriniń adamdarǵa belgili bir tapsyrmalar berip, ony oryndaǵany úshin aqy tóleý múmkindigi talqylanyp jatyr.

Bul týraly osy aptada Túrkııa Radıo Televızııa portaly habarlady. 

TRT-nyń málimetinshe, kıberqaýipsizdik mamany Býrak Bozkýrtlardyń aıtýynsha, mundaı júıeler bastapqyda dúkendegi jemis-jıdek pen kókónis bólimin sýretke túsirý sııaqty qarapaıym tapsyrmalar usynýy múmkin. Adam sýretti qosymshaǵa júktegennen keıin, kelisilgen aqy bank shotyna aýdarylady. Tapsyrmalardy oryndaǵan saıyn tabysyn arttyrýǵa múmkindik alǵan paıdalanýshylar mundaı jumystarǵa kóbirek qyzyǵýshylyq tanytýy yqtımal.

Alaıda maman bul úrdistiń qaýip týdyrýy múmkin ekenin eskertedi. Onyń pikirinshe, ýaqyt óte kele tapsyrmalar memlekettik mekemelerdiń kireberisterin, belgili bir kólikterdi nemese adamdardy fotoǵa jáne vıdeoǵa túsirýdi qamtýy múmkin. Aqsha tabýǵa qyzyqqan adamdar mundaı tapsyrmalardyń maqsatyna mán bermeı oryndaýy yqtımal. Sondyqtan Bozkýrtlar jasandy ıntellekt usynatyn aqyly tapsyrmalardyń sıpaty men yqtımal qaýipterine nazar aýdarý qajettigin atap ótti.

Sondaı-aq, osy aptada TRT basylymynda «ChatGPT jasóspirimder úshin qaýipti bolýy múmkin» degen taqyryptaǵy aqparat jarııalandy. 

Atalǵan BAQ-tyń dereginshe, Common Sense Media uıymynyń esebine sáıkes, OpenAI kompanııasynyń jasóspirimderge arnalǵan ChatGPT nusqasyndaǵy keıbir qaýipsizdik tetikteri tıisti deńgeıde jumys istemeıdi. Uıymnyń málimetinshe, jasóspirimderdiń ózine zııan keltirý, sýıtsıd jasaý nemese tamaqtaný buzylystaryna shaldyǵý qaýpi týraly ata-analarǵa eskertý jáne daǵdarys jaǵdaıynda qoldaý kórsetý fýnktsııalarynda kemshilikter bar. Osyǵan baılanysty uıym chatbottyń qaýipsizdigi tolyq qamtamasyz etilgenge deıin ony tek eresekterge qoljetimdi etýdi usyndy.

Al OpenAI kompanııasy zertteý ádistemesimen kelispeıtinin málimdedi. Kompanııa ókilderiniń aıtýynsha, synaqtardyń basym bóligi ata-ana baqylaýy fýnktsııalary tolyq iske qosylǵanǵa deıin júrgizilýi múmkin. OpenAI jasóspirimderdiń qaýipsizdigin kúsheıtip, ata-analarǵa balalardyń chatbotty paıdalanýyn baqylaýǵa arnalǵan quraldardy jetildirip jatqanyn habarlady. Aıta keteıik, Common Sense Media uıymy OpenAI jáne basqa da tehnologııalyq kompanııalardan qarjylyq qoldaý alady.

Qytaı halyqaralyq Konfýtsıı mádenıeti merekesi bastaldy– CNR

2026 jylǵy Qytaı halyqaralyq Konfýtsıı mádenıeti merekesi dúnıejúzilik órkenıetter dıalogynyń turaqty alańy sanalatyn Shandýn provıntsııasynyń Tsıýıfý qalasynda bastaldy, dep habarlaıdy qytaılyq Ortalyq halyq radıosy aqparattyq portaly. 

Atalǵan BAQ-tyń málimetinshe, bıylǵy Konfýtsıı mádenıeti merekesi «Meıirimdilik álemi jáne dúnıe júzi beıbitshiligi» taqyrybyna arnaldy. Іs-shara barysynda 21-ret «BUU-nyń bilim, ǵylym jáne mádenıet uıymynyń (ıÝNESKO) Konfýtsıı atyndaǵy bilim berý syılyǵy» tabystaldy.

Sonymen qatar dúnıejúzilik órkenıetter dıalogy alańynda «Órkenıettiń serpimdiligi jáne álemdi jańǵyrtý», «Ideıalyq pikir almasý jáne órkenıetter toǵysýy» sııaqty taqyryptar boıynsha pikirtalastar ótti.