«Qazaq ertegileriniń keıipkerleri» taqyrybynda poshta markalary toptamasy shyǵaryldy (FOTO)
ASTANA. QazAqparat - «Qazposhta» aktsıonerlik qoǵamy balalar arasynda uıymdastyrylǵan konkýrs jeńimpazdarynyń sýretterin paıdalana otyryp, «Balalar sýret salady» markalar toptamasyn shyǵardy.
14 qańtarda Qazaqstan Respýblıkasy Bilim jáne ǵylym mınıstrligi Balalardyń quqyǵyn qorǵaý komıteti «Qazposhta» aktsıonerlik qoǵamymen birlese otyryp, «Qazaq ertegileriniń keıipkerleri» taqyrybynda «Balalar sýret salady» tórt markalar toptamasyn aınalymǵa engizý saltanatyn ótkizdi, dep habarlanǵan QR BǴM saıtynda.
Aıta keteıik, Balalar quqyǵyn qorǵaý komıteti 2014 jyly balalar úıleriniń tárbıelenýshileri arasynda «Qazaq ertegileriniń keıipkerleri» taqyrybynda sýret salý konkýrsyn uıymdastyrǵan bolatyn. Konkýrsqa Qazaqstannyń barlyq óńirlerindegi balalar úıleriniń tárbıelenýshileriniń 200-den astam sýretteri qatystyryldy. Onyń qorytyndysy boıynsha jeńimpazdar retinde Jambyl oblysynan Talıpov Dmıtrıı, Batys Qazaqstan oblysynan Mýshtýbaeva Elvıra, Qostanaı oblysynan Sıdorov Aleksandr, Astana qalasynan Vasılenko Raısa anyqtaldy. Baıqaý Qazaqstan Respýblıkasynyń Balalar quqyǵyn qorǵaý týraly konventsııany ratıfıkatsııalaýdyń 20 jyldyǵymen ushtastyrylǵan.
