«Qazaq ertegileri mýltfılmge suranyp tur» - baspasózge sholý
***
«Egemen Qazaqstan» gazetinde «Álemniń 20 elinde jetistikke jetken» degen maqala berildi. Keshe Tuńǵysh Prezıdent kúni merekesine oraı «Elbasy joly» kınoepopeıasynyń «Tyǵyryqtan jol tapqan» atty tórtinshi bóliminiń tusaýkeseri bolyp ótti. Atalǵan basqosýǵa Mádenıet jáne sport vıtse-mınıstri Ǵalym Ahmedıarov, fılmniń rejısseri Rústem Ábdirashev, «Qazaqfılm» AQ prezıdenti Ermek Amanshaev jáne fılmge túsken reseılik ártis Aleksandr Rapoport pen qazaqstandyq akter Nurlan Álimjan qatysty.
Ǵalym Ahmedıarov, Mádenıet jáne sport vıtse-mınıstri:
- Mádenıet jáne sport mınıstrliginiń qoldaýymen Sháken Aımanov atyndaǵy «Qazaqfılm» kınostýdııasynyń bıylǵy jylǵy úlken jetistigi - «Elbasy joly» kınoepopeıasynyń tórtinshi bólimin túsirip, aıaqtaý boldy. «Tyǵyryqtan jol tapqan» degen ataýmen kórermenge usynylyp otyrǵan fılmniń tusaýkeseri Tuńǵysh Prezıdent kúnine oraılas ótip otyr. Biz bul fılmdi kórermenge asqan maqtanyshpen kórsete alatyn deńgeıdemiz. Elbasy Nursultan Nazarbaevtyń kóregendigi men jarqyn bolmysy kópke úlgi, kórnekti tulǵalar tarıhty jasaıtynyn eskersek, tarıh bolar tulǵany fılmge arqaý ettik.
Qazirgi tańda kez kelgen óner aıasynda, aıtalyq ádebıette, mýzykada, kórkemsýret ónerinde, kınematografııada bolsyn, Elbasynyń bitim-bolmysyn shyǵarmashylyq ónerde naqty ári laıyqty kórsete bilý úshin tereń zertteý qajet. Sol sebepti «Qazaqfılm» kınostýdııasynda týyndaǵan «Elbasy joly» degen biregeı, tyń dúnıelerge toly ulttyq kınojoba osy mindetterdi óz deńgeıinde laıyqty alyp shyqty dep esepteımin.
Bas basylymda «Tuǵyry bıik Tursynbaeva» degen maqala basyldy. Mánerlep syrǵanaýdan Germanııanyń Dortmýnd qalasynda ótken NRW Trophy-2014» týrnırinde qyzylordalyq Elızabet Tursynbaeva chempıon atandy.
Jasóspirimder arasynda ótken jarysta álemniń túkpir-túkpirinen kelgen elýge jýyq mánerlep syrǵanaýshy bes kún boıy óz sheberlikterin pash etti. 14 jasar qyzylordalyq sportshy alǵashqy kúni qysqa baǵdarlamada 58,72 upaı jınap, top bastasa, erkin baǵdarlamada da Elızabetke jeter eshkim bolmady. Otandasymyz bul synda 117,4 upaımen óziniń myqty ekenin taǵy da dáleldedi.
***
«Ana tili» gazetiniń sońǵy sanynda «Qazaq ertegileri mýltfılmge suranyp tur» atty maqala jarııalandy. Búgingi tańda memleket tarapynan qazaq tilinde túsiriletin mýltfılmderge kóńil bólinip keledi. Bul oraıda mýltfılm salasy táýelsizdik alǵan jyldardan bastap qarqyndy damydy dep aıta almaımyz. Sebebi mýltfılmder turmaq, qazaq kınosy da biraz jyldar boıy kenjelep qalǵany jasyryn emes. Eldiń áleýmettik-ekonomıkalyq jaǵdaıynyń jaqsarýymen birge rýhanı, mádenı, sonyń ishinde kıno, teatr, mýzyka, kórkem óner salalaryna da kóńil bóline bastaǵany anyq.
«Sol sebepti bizdiń ashylmaı jatqan qazynamyz ispetti bolyp otyrǵan aýyz ádebıetimiz, ertegilerimiz, ondaǵy keıipkerlerdiń barlyǵy bir-bir mýltfılm keıipkerlerine suranyp tur. Osy kúnge deıin Aldarkóse, Tazsha bala beıneleri mýltfılmde azdy-kópti somdalyp jatsa da, sol bir ertegilerimizde áli de qamtylmaı qalyp jatqan kóptegen keıipkerler bar. Endeshe, mundaı úderisti nátıje bererlikteı jolǵa qoıa bilsek jetkilikti bolar dep oılaımyn. Óıtkeni qazaq ertegileri mýltfılmge suranyp tur»,-dep jazady maqala avtory.
***
«Astana aqshamy» gazetiniń búgingi sanynda «Elbasy bas shyrsha shamyn jaqty» degen maqala berilgen. Keshe Elbasy Nursultan Nazarbaev «Astana Opera» memlekettik opera jáne balet teatry aldynda ornatylǵan elimizdegi bas shyrshanyń shamdaryn jaǵyp, búkil qazaqstandyqtardy jeltoqsandaǵy merekelerimen quttyqtady. «Astana Opera» memlekettik opera jáne balet teatrynyń alańynda qurylǵan elimizdiń bıylǵy bas shyrshasyna «Baqyt qusy» ataýy berilip otyr. Shyrshanyń bıiktigi - 25, al dıametri 16 metrdi quraıdy. Ony jasandyrý úshin 7650 metrlik bezendirý zattary, 2020 oıynshyq, 4000-nan asa túrli-tústi shamdar jáne ózge de áshekeıler qoldanylǵan. Jalpy, bıyl Astana qalasynda 19 shyrsha tigilip, olardy qurýǵa shaǵyn jáne orta bıznes sýbektileri tartylyp otyr.
