Qazaq eliniń eleýli tabystary, abyroı-bedeliniń asqaqtaýy qýantady — Tájikstan Prezıdenti
ASTANA. KAZINFORM — Dostas qazaq eliniń áleýmettik-ekonomıkalyq damýyndaǵy eleýli tabystary jáne halyqaralyq arenada abyroı-bedeliniń asqaqtaýy qýantady. Bul pikirdi Tájikstan Prezıdenti Emomalı Rahmon Aqordada BAQ ókilderine arnalǵan brıfıngte aıtty.
Tájikstan Prezıdenti qushaq jaıa qarsy alyp, qonaqjaılyq tanytqany, sondaı-aq joǵary memlekettik nagrada — Qoja Ahmet Yasaui ordenine laıyq kórgeni úshin Qazaqstan Prezıdentine alǵys aıtty.
— Tájik-qazaq qarym-qatynasyn órkendetýge qosqan azdaǵan úlesime berilgen osy joǵary baǵa meniń ǵana emes, halqymnyń eńbegine kórsetilgen syı-qurmet dep sanaımyn. Baýyrlas Qazaqstanǵa ár saparym jarqyn sátterimen este qalady. Dostas qazaq eliniń áleýmettik-ekonomıkalyq damýyndaǵy eleýli tabystary jáne halyqaralyq arenada abyroı-bedeliniń asqaqtaýy qýantady. Biz órkendeý men gúldený jolyndaǵy Qazaqstannyń úılesimdi damýyna negiz qalaıtyn keıingi jyldardaǵy reformalardy joǵary baǵalaımyz. Búgingi kelissóz konstrýktıvti saıası dıalog, ózara senim men túsinistik sıpatynda órbidi. Ekijaqty kún tártibindegi kóptegen máseleni egjeı-tegjeıli talqyladyq. Kelissóz qorytyndysy boıynsha qabyldanǵan birlesken málimdeme yntymaqtastyǵymyzdy odan ári damytýdyń basty baǵyttaryn aıqyndady, — dedi Emomalı Rahmon.
Aıta keteıik, Aqordada Qazaqstan men Tájikstannyń resmı delegatsııalary úkimetaralyq jáne vedomstvoaralyq deńgeıde 14 qujatqa qol qoıdy.
5-7 qarasha kúnderi Memleket basshysynyń shaqyrýymen elimizge Tájikstan Prezıdenti Emomalı Rahmonnyń resmı sapary ótip jatyr.
Sondaı-aq Qazaqstan men Tájikstan 2030 jylǵa deıin taýar aınalymyn ulǵaıtý jónindegi jol kartasyn qabyldady.
