Qazaq elinde ótip jatqan Dúnıejúzilik kóshpendiler oıynyna qatysqanymnyń ózi úlken mártebe – qytaılyq qazaq balýan
ASTANA. KAZINFORM – Astana qalasynda ótip jatqan 5-shi Dúnıejúzilik Kóshpendiler oıyndaryna Qytaı elinde turatyn qandastarymyz da synǵa túsip, óz sheberlikterin pásh etip jatyr.
Búgin qazaq kúresinen bastalǵan jarys aıasynda Qytaıda týyp-ósken qandasymyz Erasyl Sháıkenuly esimdi balýannan shaǵyn suhbat alýdyń sáti tústi.
- Erasyl, ózińizdi qysqasha tanystyra ketseńiz.
- Aty-jónim Erasyl Sháıkenuly. Qytaıdyń Qazaqstanmen shekeralas Tarbaǵataı qalasynda dúnıege keldim. Mine, búgin sáti túsip, Qazaq eline kelip, osynda alǵash ret ótip jatqan 5-shi Dúnıejúzilik kóshpendiler oıynyna qatysyp jatyrmyn. 74 keli salmaqta synǵa túsip jatyrmyn.
- Birinshi ret kelip tursyz ba?
- Iá, birinshi kelýim.
- Qazaq eli qalaı eken? Nesimen qyzyqtyryp jatyr?
- Óte keremet! Astana qandaı kórkem, qandaı taza qala. Kóshpendiler oıynyn da óte joǵary deńgeıde uıymdastyryp jatqany tańǵaldyrdy. Osyndaı, qazaq elinde ótip jatqan dúnıejúzilik dodada baq synap jatqanymdy maqtan tutamyn. Bul men úshin úlken mártebe.
- Qytaı quramasynan qansha balýan keldińizder?
- Qazaq kúresi men belbeý kúresine qatysýǵa jalpy 9 balýan keldik. Qazaq kúresinen birinshi beldesýimdi sátti bastap edim, ókinishke qaraı, ekinshi beldesýimde qarsylasyma jol berip qoıdym. Endi aldaǵy ýaqytta belbeý kúresinen taǵy da synǵa túsetin bolamyn.
- Qytaıda osy 5-shi Dúnıejúzilik kóshpendiler oıynyna irikteý qalaı ótti? Qandaı jetistigińizdiń arqasynda quramaǵa endińiz?
- Qytaıda osy kóshpendiler oıynyna arnalǵan arnaıy irikteý jarystar ótken bolatyn. Sol syndardan óz salmaǵymda súrinbeı óttim. Bir emes, birneshe jarysqa qatysyp, barlyǵynda jaqsy kórsetkishterge qol jetkizdim. Nátıjesinde 5-shi Dúnıejúzilik kóshpendiler oıynyna qatysýǵa múmkindik týdy.
- Ol jaqta qandaı jetistigińiz bar?
- Ol jaqta Qytaı kúresi degen kúres bar. Sol kúres túri boıynsha óz salmaǵymda chempıonmyn. Qazaq kúresimen de jıi aınalysamyn.
- Qytaı kúresi men qazaq kúresiniń qandaı aıyrmashylyǵy bar?
- Ádis jasaý jaǵy men upaı berý jaǵynda aıyrmashylyqtar kórinedi.
- Suhbatyńyzǵa raqmet!
