Qazaq eliniń qol jetkizgen jetistikteri Elbasynyń halyqaralyq arenadaǵy, álem saıasatkerleri arasyndaǵy bedeliniń kórinisi - Á.Báımenov
Bul pikirdi búgin elordada QR Tuńǵysh Prezıdenti kúnine oraı memlekettik organdar arasynda jyldam shahmattan bastalǵan týrnır barysynda QR Memlekettik qyzmet isteri agenttiginiń tóraǵasy Álıhan Báımenov bildirdi.
«Osydan 21 jyl buryn qazaq halqy tuńǵysh ret óz tarıhynda barsha halyq bolyp óz basshysyn saılady. Sol kúnge oraı qazir bizde Tuńǵysh Prezıdent kúni memlekettik mereke bolyp birinshi ret atalyp ótip otyr. Munyń óz zańdylyǵy bar. Sebebi, biz sol Tuńǵysh Prezıdentti búkil halyq bolyp saılaý arqyly ózimizdiń el ekenimizdi, derbes memleket ekenimizdi álemge pash ettik. Óz sheshimimizdi ózimiz qabyldaıtyndyǵymyzdy jarııaladyq. Osy jyldary syndarly saıasattyń arqasynda Qazaqstan álemde abyroıly orny bar memleketke aınaldy. Qazaq «Elý jylda el jańa» deýshi edi, 20 jylda jańa qoǵam quryldy», - dedi ol.
Osy oraıda agenttigik basshysy 20 jyl buryn elimizde qandaı qoǵam bolǵanyn, qandaı qıyndyqtar bolǵanyn barshamyz da jaqsy biletindigimizdi basa aıtty. Onyń paıymynsha, sodan bergi zamanda qoǵam jańa kelbetke ıe boldy. Júzdegen myń adam menshik ıesi bolyp, óziniń quqyǵyn júzege asyratyn azamatqa aınaldy. Saıası quqyqtardy júzege asyrý arqyly elimizde qazir kóptegen saıası partııalar jumys jasaýda.
«Astana qazaq qazaq bolǵaly ózi tańdap, boı túzegen birinshi bas qala. Astanannyń saltanatyna osynda kelgen sheteldik sarapshylar tamsanady. Biraq Astana tek saltanatty ǵana emes, sonymen qatar álemge qajet ıdeıalardy týyndatatyn ortalyqqa aınaldy. Onyń ishinde G-global, AÓSІShK bar. Astanada EQYU sammıti ótti. Keshe ǵana EHRO-2017 ýórmesi bizde ótetin bolyp sheshim qabyldandy. Munyń barlyǵy bizdiń Elbasynyń halyqaralyq arenadaǵy, álem saıasatkerleri ishindegi bedeliniń kórinisi. Bul jaı kelmeıdi. Ol sonaý 91 jyldan bastap qabyldanǵan sheshimderdiń uzaq merzimdi basymdyqtarǵa negizdelgeniniń bir kórinisi», - dedi Á.Báımenov.
