Qazaq eline Alashtan artyq ıdeıa joq – «Aq jol» partııasynyń saılaýaldy baǵdarlamasy
«Aq jol» demokratııalyq partııasynyń tóraǵasy Azat Perýashev baǵdarlamadaǵy eń negizgi basymdyq – Táýelsizdik jáne Alash ulttyq ıdeıasy ekenin basa aıtty.
«Sońǵy kezdegi birqatar oqıǵa tizbegi byltyr QR Tuńǵysh Prezıdentiniń memleket bıligin órkenıetti túrde jańa basshyǵa tapsyrýy der kezinde bolǵanyn ýaqyttyń ózi dáleldep otyr. Nursultan Nazarbaevtyń prezıdenttik júıesi el táýelsizdiginiń bastaýynda, memlekettik ınstıtýttardyń qalyptasýynda, túbegeıli naryqtyq jáne qoǵamdyq reformalardy júrgizýde jáne basqa eldermen qarym-qatynas ornatýda tarıhı mıssııasyn oryndady. Kelesi kezeńde Qazaqstan qalyptasqan memleket retinde aıaq basty. Al endigi máselelerdi sheshý úshin jańa tásilder kerek. Memleket basqarý isine qoǵam jan-jaqty aralasyp, ony baqylaýy kerek. Elimizge áleýmettik-ekononmıkalyq salada, saıası júıege de túbegeıli ózgerister qajet.
«Atalǵan ózgeristerdi tym soza berýdiń qaýiptiligi sonda, bul Ýkraına, Belarýs pen Qyrǵyz elindeı memlekettik daǵdarysqa ákep soǵýy múmkin. Al Táýelsizdiktiń eń basty kepili – qarý emes, óz memleketin syılaıtyn, baǵalaıtyn azamattyq qoǵam bolýy kerek. Sondyqtan, qazirgi bılik modeline bir ǵana balama bar. Ol – tereń áleýmettik-ekonomıkalyq jáne saıası reformalardy qabyldap, júzege asyrý qajet. «Aq jol» demokratııalyq partııasy jańa jáne ádil Qazaqstanǵa aparatyn ózgerister baǵdarlamasyn usynady. Sol baǵdarlamadaǵy basty basymdyǵymyz – Táýelsizdik jáne Alash ulttyq ıdeıasy.
Elimizdiń Táýelsizdigi men ulttyq múddeler – memlekettiń negizgi basymdyqtary. HH ǵasyrdaǵy «Alash» ulttyq avtonomııasynyń kóshbasshysy Álıhan Bókeıhan «Memlekettigi joq halyq – jetim» dedi. Al QR Tuńǵysh Prezıdenti Nursultan Nazarbaev «Táýelsizdik úshin qurbandyqqa aıanatyn eshteńe joq» dedi. Qazaqstan Respýblıkasynyń Táýelsizdigin qamtamasyz etý jáne onyń ulttyq múddelerin qorǵaý – ózin respýblıka azamaty sanaıtyn kez kelgen adamnyń paryzy. Táýelsizdik – bizdiń elimiz, jerimiz, tilimiz ben dilimiz. Táýelsizdik – bizdiń óz jolymyzdy tańdaý múmkindigimiz, keleshek urpaqtyń bolashaǵy úshin bizdiń jaýapkershiligimiz», - deıdi A. Perýashev.
Táýelsizdik pen elimizdiń tutastyǵy – árbir adamnyń ómiri, quqyǵy jáne bostandyǵymen qatar turatyn basty qundylyq.
«Táýelsizdik bastaýynda qazaq halqynyń erkindigi men eldiginiń tarıhı muraty retindegi Alash ulttyq ıdeıasy jatyr. Qazaq eline Alashtan artyq ıdeıa joq. «Aqjol» demokratııalyq partııasy memlekettik tildiń qoldaný aıasyn keńeıtýdi qoldaıdy. Qazaq tili ekonomıka men qarjy salasynda, memlekettik basqarý men sheteldik ınvestorlar jumysyna memlekettik deńgeıge saı engizýimiz kerek», - dedi Azat Perýashev.
