Qazaq elinde dúnıege kelgen ıdeıalardyń jańǵyryǵy Japonııadan da estile bastady - respýblıkalyq basylymdarǵa sholý
ASTANA. Qazannyń 23-i. / QazAqparat/ Qazaq aqparat agenttigi respýblıkalyq basylymdarda qazannyń 23-i, juma kúni shyqqan ózekti materıaldarǵa sholýdy usynady.
***
«Túrkııa Respýblıkasyna resmı saparmen kelgen Qazaqstan Respýblıkasynyń Prezıdenti Nursultan Nazarbaev keshe Túrkııa Prezıdenti Abdolla Gúlmen kezdesti. Elbasy sol kúni túrik Úkimeti men Parlamentiniń basshylarymen, belgili partııalardyń jetekshilerimen áńgimelesti. Qazaqstan basshysy Túrkııa Parlamentinde sóz sóıledi», dep jazady «Egemen Qazaqstan» gazeti. Elbasynyń túrik memleketine jasaǵan resmı sapary jaıynda egjeı-tegjeıli jazylǵan kólemdi maqala basylymnyń búgingi sanynda «Túbi bir halyqtyń tilegi de bir» degen taqyryppen jaryq kórgen.
Sonymen qatar Memleket basshysynyń osy sapary jaıynda «Aıqyn» gazetiniń búgingi sanynan da oqı alasyzdar. Osy aıtýly saparǵa oraı «Kazahstanskaıa pravda», «Lıter», «Ekspress K» gazetterinde de maqalalar jaryq kórgen.
«Egemen Qazaqstan» gazetiniń dástúrli «Úkimet» aptalyǵynda birneshe maqala toptamasy jaryq kórdi. Solardyń biri «Toǵyz aılyq qorytyndy» dep atalady. Atalǵan jarııalanym «Sonymen ústimizdegi jyldyń 9 aılyq qorytyndysy Qazaqstan ekonomıkasynyń daǵdaryspen kúreske qabiletti ekendigin, aldymyzda damýdyń úlken áleýeti jatqandyǵyn kórsetip berdi. Endigi basty másele ishki jalpy ónimniń kólemin quldyratpaı, ótken jylmen salystyrǵanda ósim deńgeıine qol jetkizý. Bul jeńil mindet emes. Biraq qazirgi boljamdarǵa qaraǵanda onyń oryndalatyndyǵyna úmit mol», dep qorytyndylanǵan.
«Qazaqstannyń Eýropadaǵy qaýipsizdik jáne yntymaqtastyq uıymyna tóraǵalyq etýiniń qarsańynda jáne Qazaqstan halqy Assambleıasynyń XV sessııasynyń óter aldynda Memlekettik hatshy - Syrtqy ister mınıstri Qanat Saýdabaevtyń tóraǵalyǵymen qazannyń 20-ynda Aqordada QHA sessııasyna ázirliktiń barysyn jáne ótkizý máselelerin qaraǵan keńes bolyp ótti. Oǵan Prezıdent Ákimshiliginiń Basshysy Aslan Mýsın, ortalyq jáne jergilikti atqarýshy bılik organdarynyń jetekshileri, QHA ókilderi qatysty. Ol jaıynda gazetimizdiń ótken sanynda habarlaǵan bolatynbyz. Alaıda, aldaǵy ótetin sessııanyń jáne el ómirindegi QHA-nyń mańyzdylyǵyn eskerip, Memlekettik hatshy - Syrtqy ister mınıstri baıandamasynyń ózekti tustaryn oqyrmandar nazaryna tarqatyp usynǵandy jón kórdik», dep jazady «Egemen Qazaqstan» basylymy. Baıandamanyń ózekti tustaryn «Halyq birligi - el basymdyǵy» atty maqaladan jan-jaqty tanysa alasyzdar.
***
«Sarandy dúrliktirgen sumdyq oqıǵa» degen taqyryppen «Aıqyn» gazetinde jaryq kórgen shaǵyn maqalada Qaraǵandy oblysyndaǵy Saran qalasynyń jergilikti ishki ister qyzmetkeri tal túste áıelin atyp, artynan óziniń de atylǵany jaıynda jazylǵan. «Keshe osy oqıǵaǵa baılanysty Saran qalalyq polıtsııa bóliminiń bastyǵy men onyń orynbasarlary jáne ýaqytsha qamaý abaqtysynyń bastyǵy laýazymdy qyzmetterinen bosatyldy. Polıtsııa basshylaryna «qarý-jaraqtardy paıdalanýǵa qajetti baqylaý jasamady, sonyń saldarynan konvoı qyzmetiniń serjanty tabeldik qarýyn tapsyrmastan úıine ketip, munyń sońy qaıǵyly oqıǵaǵa dýshar etti» degen aıyp taǵylyp otyr. Bul jóninde Qaraǵandy oblystyq ІІD baspasóz qyzmeti habarlady», dep jazady basylym.
«Aıqyn» gazetiniń búgingi nómirindegi «Aq sóıle!» aıdarynyń qonaǵy - Qazaqstannyń Japonııadaǵy Tótenshe jáne Ókiletti Elshisi Aqylbek Kamaldınov. Ekeýara áńgime japonııadaǵy saıası júıedegi ózgeristerden bastalyp, uly jazýshy Muhtar Áýezovtiń 1957 jyly Keńes odaǵy delegatsııasynyń quramynda japon eline jasaǵan saparymen túıindelgen. Jazýshynyń osy sapary jaıynda elshi «Biz uzaq izdestirý nátıjesinde jazýshynyń Tokıo jastary aldynda jasaǵan baıandamasynyń japon tilindegi mátinin kezdestire aldyq. Ony elshilik qyzmetkerleri japon tilinen qazaq tiline aýdaryp shyqty. Áýezov baıandamasynyń bizge jetken bir bóligi respýblıkalyq «Egemen Qazaqstan» gazetinde jarııalandy. Bul Áýezovtanýdyń kelesi bir qyryn ashýǵa múmkindik beretin, jol ashatyn jańalyq dep úmittenemin. Eger osy jaıtty tereńdep zerttese, Japon sapary jaıly, Alash zııalylaryna arman bolǵan Japonııanyń 20 ǵasyrdaǵy tarıhı róli jaıly biraz derekter tabylyp qalýy ábden múmkin», depti. Suhbat «Qazaq elinde dúnıege kelgen ıdeıalardyń jańǵyryǵy Japonııadan da estile bastady» degen taqyryppen berilgen.
«Shymkent munaı óńdeý zaýytynyń basshylary shıkizat tapshylyǵyna baılanysty jumysyn 1 aıǵa toqtatatynyn habarlady. Qazaq elinde munaı óńdeýmen aınalysatyn zaýyt bar bolǵany 3-eý ǵana», dep jazady «Aıqyn» gazeti. Elimizdegi janar maı baǵasyna sholý jasalǵan shaǵyn maqala «Shymkent munaı óńdeý zaýyty jumysyn toqtatty» degen ataýmen jarııalanǵan. Basylymnyń jazýynsha, zaýyt basshylary onyń sebebin bylaı túsindiredi «Búkil jóndeý jumystary jáne ınvestıtsııalyq jobalar zaýyttyń qyzmetin jaqsartýǵa jáne bolashaqta zaýyttyń sapaly ári úzdiksiz jumysyn qamtamasyz etý úshin onyń jabdyqtarynyń senimdiligin arttyrýǵa baǵyttalǵan».
***
«Jas qazaq» gazetinde «Aqsaılyqtar azamat eken» degen taqyryppen maqala jaryq kórdi. «Maýsym aıynda jergilikti aqparat quraldarynan Aqsaı qalasyndaǵy Zavodskaıa kóshesi (negizi Jaıyq) Qarashyǵanaq kenishin ıgerip jatqan «KPO» kompanııasynyń bas dırektory, aǵylshyn azamaty Rodjer Foks bolyp ózgertilgenin estidik. Birlesken sheshim men qaýlyǵa baılanysty aýdan ákimdigi men máslıhat ókilderiniń bergen túsiniktemelerinde:«Barlyq depýtat, onyń ishinde sessııaǵa qatyspaǵandary da tolyq qoldady. 148 turǵyn óz kóshelerine R.Foks atyn berýdi qoldap, qoldaryn qoıdy» degen edi. Osyny oqyǵanymda turǵyndardyń ulttyq namysy jáne bolashaq urpaq aldynda jaýapkershiligi joq qara basyn oılaǵandar shyǵar dep, qatty renjidim. Kóńilim qulazydy. Anyǵyn bilýdi azamattyq paryzym sanap, Aqsaı qalasyna attandym», delingen. Aqsaı qalasyndaǵy oqıǵanyń qalaı órbiginen egjeı-tegjeıli basylymnyń búgini sanynan oqı alasyzdar.
Osy basylymda Úndistannyń Halyqaralyq Padma Shrı Syılyǵynyń laýreaty, Pákistannyń Ikbal Akademııasy «Ikbaldyń Altyn Eskertkishi» syılyǵynyń ıegeri Áýbákir Dastanulynyń «Shyńǵyshannyń sońǵy kúni» atty kólemdi áńgimesi jaryq kórdi.
«Arqalyqta bastalyp Elordaǵa deıin jetken bitpes daýdyń qazirgi jaıy ıtjyǵys. Bul oqıǵada jeńgen de, jeńilgen de eshkim joq, tek eki taraptyń yryń-jyryńynan ábden mezi bolǵan stýdentter men ustazdar ǵana bar. Bastysy, ustaz uıymdastyrýshy, stýdent qolshoqpar rólin ıemdengen bul oqıǵaǵa tóreligin aıtyp, toqtaý salatyn eshkim bolmaı tur», dep jazady «Jas qazaq» basylymy. Arqalyqtaǵy Y.Altynsarın atyndaǵy memlekettik pedagogıkalyq ınstıtýt bashylary men stýdentter arasyndaǵy kıkiljińdi jan-jaqty bilgińiz kelse, basylymda jaryq kórgen «Alfa» jáne onyń komandasy» atty maqalany oqyńyz.
«Kazahstanskaıa pravda» gazetiniń jazýynsha, «Batys Eýropa - Batys Qytaı» jolynyń jobasy sheńberinde OQO men Taraz arasyndaǵy shekaradaǵy avtojoldyń ár shaqyrymy 3,5 mln dollar turady jáne ol ózin-ózi aqtaıdy eken. Keshe spıker Qasym-Jomart Toqaevtyń tóraǵalyǵymen ótken jalpy otyrysta Qazaqstan men Islam damý banki arasyndaǵy atalǵan ýchaskege baılanysty kelisim ratıfıkatsııalanǵan. Osy kelisimge sáıkes IDB joldyń 58 shaqyrymyn jańǵyrtýǵa 170 mln dollar nesıe bóledi.
«Astanalyq «Barys» hokkeı komandasy jańa jeńiske jetti», dep jazady «Lıter» gazeti.
Basylymnyń jazýynsha, osydan sál ǵana buryn astanalyq ujym óz qarsylastaryna upaı berýmen ǵana kelgen. Endigi ýaqytta jaǵdaı ózgerip otyr. Aldyńǵy kúni Astanada «Barys» nıjegorodtyq «Torpedo» komandasyn 4:2 esebimen utqan.
«Ekspress K» basylymnyń habarlaýynsha, elordada elimizdiń Sporttyq poker federatsııasynyń fılıaly ashylady. Buǵan taıaýda ǵana azııalyq poker týrnırinde 4-shi oryndy ıelengen almatylyq Darhan Botabaevtyń jetistigi túrtki bolǵan. Ol osy týrnırde júldege tigilgen 166 myń dollardy qanjyǵasyna baılaǵan.
