Qazaq eli taǵy bir tarlanynan aıyryldy – Aıda Balaeva

NUR-SULTAN. QazAqparat – Qazaq eli taǵy bir tóbesi bıik tarlanynan aıyryldy. QR Aqparat jáne qoǵamdyq damý mınıstri Aıda Balaeva kórnekti sáýletshi, Qazaqstan Eltańbasynyń avtory Shot-Aman Ýálıhanovtyń qazasyna baılanysty jelide osylaı dep kóńil aıtty.

«89 jasqa qaraǵan shaǵynda Qazaqstan Respýblıkasy Eltańbasynyń avtory, tanymal músinshi, belgili arhıtektor Shot-Aman Ýálıhan aǵamyz dúnıe saldy. Sóz joq, búgin osynaý orny tolmas qaıǵyǵa Shot-Aman aǵamyzdyń otbasy, aınala-jaqyndarymen birge onyń tarıhı tulǵasyn áspettegen búkil qazaq eli ortaqtasyp jatyr. Óıtkeni, asyl aǵamyz boıyndaǵy bar ilim-bilimi, týma talanty, zııaly bolmysymen Ult kelbetin aıshyqtaǵan uly eńbegin urpaqtar enshisine baılap, memleketimizdiń mártebesine aınaldyryp ketti. Onyń jarqyn beınesi el esinde máńgilik saqtalady. Marqumnyń topyraǵy torqa, jany janatta bolsyn!»,-dep jazdy mınıstr Facebook -tegi paraqshasynda.