«Qazaq Eli» mýltfılmi Barselonada kórsetiledi
ASTANA. QazAqparat - «Qazaq eli» atty qazaq mýltıplıkatsııasy tarıhyndaǵy tuńǵysh tarıhı tolyqmetrajdy anımatsııalyq fılmi qarashanyń 4-i men 13-i aralyǵynda Barselonada (Ispanııa) ótetin Azııa fılmderi kınofestıvaliniń (Asian Film Festival) negizgi baıqaýyna iriktelip alyndy. Bul týraly QazAqparat «Qazaq fılm» kınostýdııasynyń baspasóz qyzmetine silteme jasap habarlady.
Anımatsııalyq kınotýyndynyń halyqaralyq kınofestıvalderde kórsetilip, keńinen nasıhattalý jumystaryn Sh.Aımanov atyndaǵy «Qazaqfılm» AQ júzege asyrady. QR Mádenıet jáne sport mınıstrligi tapsyrysy boıynsha «SAQ-dala» JShS túsirgen «Qazaq eli» anımatsııalyq fılmi bolashaq handar - Jánibek pen Kereıdiń balalyq shaǵy men eseıý jyldary týraly baıandaıdy. Mýltfılmde shetsiz-sheksiz qazaq dalasy, zańǵar taýlar jáne Uly Jibek jolyndaǵy Syǵanaq, Otyrar, Taraz jáne Túrkistan sekildi ejelgi qalalar beınelengen.
«Fılm halyqaralyq arenada - sonaý Ispanııada kórsetiletinine qýanyshtymyn. Bul mýltfılmdi biz eń birinshiden balalarǵa arnap jasadyq. Kartınada bostandyq pen táýelsizdik úshin kúres jolynda qazaq eliniń basyn qalaı biriktirgendigi jaıly áńgimelenedi.Sondyqtan ıspandyq kórermender de elimizdiń baı tarıhymen tanysatyn bolady», - dedi fılmniń rejısseri Batyrhan Dáýrenbekov.
Atalmysh festıvalde 20 Azııa elderiniń 80-ge jýyq fılmderi kórsetiledi. Otandyq týyndydan basqa festıvalge Qytaı, Koreı, Iran, Fılıppın, Sıngapýr, Aýǵanystan, Jańa Zelandııa, Taıland, Malaızııa jáne Vetnam elderiniń fılmderi qatysady. Aıta ketetin jaıt, festıval sheńberinde Sh.Aımanov atyndaǵy «Qazaqfılm» AQ jaryqqa shyǵarǵan Satybaldy Narymbetovtyń «Amanat» jáne Doshan Joljaqsynovtyń «Qunanbaı» tarıhı týyndylary, sonymen qatar Asqar Uzabaevtyń «Jol» dramasy men Murat Mahannyń debıýttik «Sot oryndaýshysy» fılmi kórsetiledi. 
Esterińizge sala ketsek, jasalýynda 2-D jáne 3D-tehnologııalar paıdalanylǵan «Qazaq eli» anımatsııalyq fılmi ústimizdegi jyly mamyr aıynda kópshilik nazaryna usynylyp, kınoteatrlardan kórsetilgen bolatyn. Fılmniń jaryqqa shyǵýyna atsalysqandar qatarynda QR mádenıet jáne sport mınıstri Arystanbek Muhamedıuly, tarıh ǵylymdarynyń doktory Jambyl Artyqbaı jáne belgili jazýshy Dýlat Isabekov te bar. Bas keıipkerlerdi Ǵ.Músirepov atyndaǵy Qazaq Memlekettik akademııalyq balalar jáne jasóspirimder teatrynyń, sondaı-aq, J.Shanın atyndaǵy Ońtústik-Qazaqstan oblystyq qazaq drama teatrynyń ártisteri dybystady. Fılmniń saýndtrekterin Nurlan Abdýllın, Sáken Maıǵazıev jáne basqa da tanymal qazaqstandyq ánshiler oryndady.
