«Qazaq eli» monýmenti jastardyń patrıottyq sezimin oıatyp, eline degen ystyq súıispenshiligin arttyratynyna senimdimin - Astana qalalyq ІІD bastyǵy M.Demeýov
ANA. Qazannyń 22-si. QazAqparat /Marlan Jıembaı/ - Kúni keshe elordanyń negizgi alańynda bas qosqan 70 myńǵa tarta qala halqy men memleketimizdiń betke ustar azamattary qosymsha kompozıtsııalarymen kómkerilgen «Qazaq eli» sáýlettik-músindik kesheniniń ashylý saltanatyn tamashalaǵan bolatyn.
Osy aıtýly sharaǵa oraı óz oılary men pikirlerin bildirgen azamattar barshylyq. Solardyń biri Astana qalalyq ishki ister departamentiniń bastyǵy, polıtsııa polkovnıgi Marat Demeýov óz oıyn bylaı jetkizdi:
«Qazaqqa teńdik pen erkindik, bostandyq pen egemendik qalaı kelgenin saraptaıtyn bolsaq, árıne, eń aldymen qaısar minezi, qaharmandyǵy men batyrlyǵy arqasynda kelgenin túsinemiz. Ata-babalarymyz Arqadan Alataýǵa, Atyraýdan Altaıǵa deıin sozylyp jatqan ulan-baıtaq jerimizdi aq naızanyń ushymen, aq bilektiń kúshimen qorǵaǵan. Osy ulan baıtaq dalada, mine, búgingi kúni beıbit urpaq ómir súrip, kósheli kósemimen bolashaqqa bet túzep barady. Osy oraıda eldigimizdi, memlekettigimizdi álem jurtshylyǵyna pash eter biregeı sáýlet ónerine qosylǵan kompozıtsııalardyń birine «Qaharmandyq» degen ataý berip, at ústindegi el qorǵaǵan sarbazdyń jáne qolynda avtomaty bar jaýyngerdiń eldiń shebin kúzetken jıyntyq beınelerin bederleý zańdylyq.
Keshegi el qorǵany bolǵan batyrlardyń ornyn shekaramyzdyń, memleketimizdiń tynyshtyǵyn kúzeter jaýyngerlerimizben qatar, el ishinde halqymyzdyń beıbit ómir súrýine kepil bolatyn tártip saqshylary basyp otyr.
Aǵymdaǵy jyly Qazaqstan halqyna joldaǵan dástúrli joldaýynda Memleket basshysy quqyq qorǵaý organdarynyń qyzmetkerlerine birneshe naqty mindetter júktegen bolatyn. Ol eń aldymen qarapaıym turǵyndardyń tynyshtyqta, beıbitshilikte esh alańsyz ómir súrýin qamtamasyz etýge baılanysty. Osy oraıda elordalyq ishki ister qyzmetkerleriniń múmkindigi jeterlik, sonymen qatar olarǵa memlekettik qoldaý da jetkilikti. Qazirgi urpaq - ýaıym-qaıǵysy joq, baqytty urpaq. Kóptegen jastar qoldaryna qarý ustap el qorǵany bolýǵa, qylmystardyń aldyn alý úrdisine óz úlesin qosýǵa daıyn. Biraq bul qyzmet - shala-sharpy oılanyp, sheshim qabyldap, ornalasa salatyn jer emes. Bul qyzmetke barý úshin eń aldymen qaharmandyqqa bastaıtyn qaısar minez, temirdeı qatal tártipke baǵynatyn tózimdilik, qýǵanǵa jetkizbes ushqyr oı qajet. Sondyqtan bizder sym boıymen sap túzep, qatarǵa qosylǵan saqshylardyń kókeıine eldik pen erlik uǵymyn uıalatý úshin ter tógýdemiz. Árbir qyzmetker ıyǵyna taqqan pagondy, halyqtyń senimin aqtaý úshin berilgen «joldama» dep túsingeni abzal. Tek sonda ǵana ata-babalarymyz ǵasyrlar boıy shólirkep, ańsaǵan táýelsizdiktiń, egemendiktiń qadir-qasıeti aqtalady dep senemin.
Al táýelsizdigimizdiń, egemendigimizdiń, memlekettigimizdiń temirqazyǵy bolǵan Elbasymyz N.Nazarbaevtyń bastamasymen ashylǵan «Qazaq eli» monýmenti áli talaı jastyń patrıottyq sezimin oıatyp, eline degen ystyq súıispenshiligin arttyratynyna senimdimin».
