Qazaq eli meni óz balasyndaı tárbıeledi – Antonına Evdokımova
AQTÓBE. QazAqparat – Aqtóbeniń shalǵaı aýdanynda turatyn Antonına Evdokımovanyń ulty orys bolsa da qazaqy tárbıe alǵan. Bir aýyldaǵy jalǵyz ózge ult ókili qazir Tanıa áje atanyp ketken, dep habarlaıdy QazAqparat tilshisi.
Antonına Evdokımova Yrǵyz aýdanynyń Aqshı aýylynda turady. Qarııa nemere-shóbere qyzyǵyn kórip, aýylda «Tanıa áje» atanyp ketti. Ol 1953 jyly Ózbekstannyń Seıhýndarııa oblysyna qarasty Termez qalasynda dúnıege kelgen. Ákesi áskerı qyzmetker, anasy dáriger boldy. 1964 jyly anasynyń jumys babymen shalǵaı, qazaq aýylyna qonys aýdardy. Sodan beri alysqa uzap shyqqan emes.
«Men qoı qyrqyp, sıyr saýyp, pishende júrdim. 1969 jyldyń shilde aıynda Amangeldi Bólekbaev áskerden kelip, turmys qurdym. Ózim 11 qursaq kótergen edim. Qazir 5 balam bar. Qaıyn inimniń jetim qalǵan tórt balasyn baýyryma basyp, ósirdim, tórt aýyl ettim. Balalarym da kópbalaly», - dedi Antonına Evdokımova.
Yrǵyz aýdanynyń birneshe aýyly men oblys ortalyǵyndaǵy balalary qarııanyń jan jylýy, júregi. Densaýlyǵy myǵym, júris-turysy shıraq Tanıa áje zeınetke shyqqan soń toqyma toqydy. Nemerelerine qajetti jyly kıimniń bárin ózi túgeldep berip otyr.
«Jún tútip, urshyq ıiremin. Nemerelerimdi kıindiremin, suraǵan adamdardyń ótinishin aıaqsyz qaldyrǵan emespin. Bul anamnan qalǵan óner», - dedi ol.
Qazaq otbasyna kelin bop túsken kúnderin eske alǵan qarııa elgezektiginiń arqasynda úlken men kishige izet kórsetip, búkil aýyldyń anasy atandy.
«Jan-jaǵyńa qara, ne istese, sony qaıtala» dep atam aıtqan edi. Sóıtip júrip tildi úırendim, tez aralasyp kettim. Qazir qazaqsha sóıleımin. 50 jyldan astam ýaqytta orys tilin de umyta bastadym. Salt-dástúrdi bilemin. Kelin túsiný, ony tárbıeleý, bala ósirý, qonaqjaılylyǵy bári-bári men úshin ystyq. Úılený toıy, týǵan kún, súndet toı da qazaq dástúrimen ótedi. Qazaq eli meni ortaǵa alyp, óz balasyndaı tárbıeledi. Sondyqtan alǵysym sheksiz», - dedi Antonına Evdokımova.
Ol án de aıtady. Qoǵamdaǵy erekshe belsendiligi úshin Qazaqstan halqy Assambleıasy jylyna oraı aýdannyń «Jyl adamy» atandy.
«2010 qurylǵan ájeler ansambliniń múshesi óte belsendi. Aýyl, aýdandaǵy sharalarǵa qatysyp júr. Marapaty kóp, maqtaýly qarııa», - dedi aýyl klýbynyń mádenı jumysyn uıymdastyrýshysy Kúnsulý Qapızova.
Basty foto: aktobetv.kz
