Qazaq eli barda Farızanyń aty da, poezııasy da umytylmaıdy - jazýshy Álibek Asqarov

ASTANA. 27 qańtar. QazAqparat - Qazaq barda, qazaq eli barda Farızanyń aty da umytylmaıdy, poezııasy da umytylmaıdy, deıdi jazýshy, Memlekettik syılyqtyń laýreaty Álibek Asqarov Astanada Farıza Ońǵarsynovany aqtyq saparǵa shyǵaryp salý rásimi kezinde. "Ol týrashyl, minezi tik, betińe týra aıtyp salatyn qaıratty adam edi", - dep eske alady jazýshy.

"Byltyrǵy 2013 jyl rýhanı álemde, mádenıetimizde tutastaı Farıza jyly bolyp ataldy. "Bir el - bir kitap" sharasynyń jetinshi jylynda qalaýymyz Farıza apamyzdyń poezııasyna túsip edi. Jyl boıy kúlli kitaphanalarda, mektepterde sonyń aıasynda 2 myńǵa jýyq úlken is-sharalar ótken. Oǵan mıllıonǵa jýyq oqyrman qatysqan. Bul halqymyzdyń Farıza poezııasyn qanshalyqty súıetinin kórsetedi. Kesheli-búgin myna jınalǵan halyqtyń kóptigin qarasańyz, bunyń ózi de ne degen súıispenshilikke bólengen adam dep oılaısyz. Qazaqtyń asyl qyzyn, poezııamyzdyń patshaıymyn qazir shyǵaryp salǵaly otyrmyz. Qazaq barda, qazaq eli barda Farızanyń aty da umytylmaıdy, poezııasy da umytylmaıdy", - dep túıdi sózin Á. Asqarov. Aıta keteıik, búgin Astanada qazaq halqy óziniń aıaýly aqyny, qaıratker qyzy Farıza Ońǵarsynovamen qoshtasýda. Aıaýly aqyn apamyzdy aqtyq saparǵa shyǵaryp salýǵa QR Premer-Mınıstri Serik Ahmetov, QR Parlamenti Senatynyń spıkeri Qasym-Jomart Toqaev, vıtse-premer Gúlshara Ábdihalyqova, Astana ákimi Imanǵalı Tasmaǵambetov, QR Mádenıet jáne aqparat mınıstri Muhtar Qul-Muhammed, QR Parlamenti depýtattary, elimizdiń kórnekti mádenıet jáne óner qaıratkerleri, jazýshylar, aqyndar jáne myńǵa tarta Astana jurty keldi.