«Qazaq eli» anımatsııalyq fılmindegi ánderdi Nurlan Abdýllın men Sáken Maıǵazıev oryndady
ASTANA. QazAqparat - «Qazaq eli» anımatsııalyq fılminde ánderdi oryndaýǵa Nurlan Abdýllın, Sáken Maıǵazıev syndy tanymal ánshiler tartyldy. Bul týraly búgin Ortalyq kommýnıkatsııalar qyzmetindegi baspasóz máslıhatynda fılmniń bas prodıýsseri Sábıt Ábdiqalyqov málim etti.
«Qazir prokattyń aldynda orys tilinde dybystaý sharalary júrgizilýde. Negizi qazaq tilindegi nusqasy tolyq daıyn»,-dedi bas prodıýsser.
Onyń sózine qaraǵanda, jalpy dybystaý jumystaryna Ǵabıt Músirepov atyndaǵy balalar jáne jasóspirimder teatrynyń akterleri atsalysty. «Іshinde ánderdi oryndaýǵa Nurlan Abdýllın, Sáken Maıǵazıev sııaqty ánshiler tartyldy»,-dedi Sábıt Ábdiqalyqov.
Anımatsııalyq fılmniń elimizdiń kınoteatrlaryndaǵy resmı prokaty naýryz aıyna josparlanǵan. «Saq» kınostýdııasy fılmniń hronometrajy 75 mınýttyq tolyqmetrajdy nusqasyn daıyndady. Aıta keteıik, Qazaqstan anımatorlary sapaly anımatsııalyq lentany shetel mýltfılmderine qaraǵanda 60 ese arzan bıýdjetpen jasap shyǵardy. Fılmniń dırektory Nýrıddın Patteevtiń aıtýynsha, kartınanyń bıýdjeti 375 mln. teńgeni qurady.
Fılmniń tarıhı keńesshisi - tarıh ǵalymdarynyń doktory, professor Jambyl Artyqbaı. Fılmniń ádebı keńesshi - Dýlat Isabekov, rejısseri - Batyrhan Dáýrenbekov, stsenarısi - Saǵadildá Úsibálıev, Baqytjan Quljabaı, kompozıtory - Rýslan Shynyqulov, qoıýshy sýretshisi - Azamat Ernazarov, fılmniń dırektory - Nýrıddın Patteev, bas prodıýsseri - Sábıt Ábdiqalyqov.
Fılmdegi oqıǵa jelisi Kereı men Jánibektiń bala kezderinen bastap eseıip, erjetip, el basqaryp, Qazaq handyǵyn qurǵanǵa deıingi aralyqty qamtıdy. Fılmniń maqsaty balalardyń óz tarıhyn túsinýine, Kereı men Jánibekteı batyrlardyń qazaq handyǵyn qalaı qurǵanyn bilip, solarǵa elikteýge, óz eliniń patrıoty bolyp ósýlerine jol ashý bolyp tabylady.
