«Qazaq eli» anımatsııalyq fılmi halyqaralyq baıqaýda úzdik atandy
ASTANA. QazAqparat - Astanada HІІІ Halyqaralyq «Eýrazııa» kınofestıvali aıasynda ótken «Bes qurlyq» balalar fılmderiniń festıvalinde «SAQ» kınostýdııasynyń «Qazaq Eli» tolyqmetrajdy anımatsııalyq fılmi «Eń úzdik stsenarıı» nomınatsııasyn jeńip aldy.
Atalǵan baıqaý Kann, Berlın, Venetsııa syndy festıvaldermen teń dárejede prodıýserlik qaýymdastyqtyń Halyqaralyq odaǵynda (FIAPF) tirkelgen, Orta Azııadaǵy orasan zor kınoforým bolyp tabylady.
Saltanatty sharada «Qazaq eli» anımatsııalyq fılminiń rejısseri, oblystyq Mádenıet basqarmasynyń «Ońtústikfılm» KMM-niń dırektory, «SAQ» kınostýdııasynyń belgili stsenarısti, rejısser Batyrhan Dáýrenbekovke kınofestıvalge belsene qatysyp, balalar kınosynyń damýyna yqpal jasaǵany úshin QR Tuńǵysh Prezıdenti - Elbasy Qorynyń arnaıy júldesi men «Alǵys haty» saltanatty túrde tapsyryldy, dep habarlaıdy OQO ákiminiń baspasóz qyzmeti.
Festıval baǵdarlamasynda Qazaqstan, Frantsııa, Nıderland, Qytaı, Aýǵanstan, Iran, Týnıs, Perý, Úndistan, Meksıka, Ispanııa, Italııa, Danııa, Grýzııa jáne t.b. elderdiń shyǵarmashylyq toptarynyń jumystary kórsetildi. Sonymen qatar, «Bes qurlyq» balalar kınofestıvaliniń ashylý saltanatyna «Oskar», «Altyn globýs» syndy kıno ónerindegi bedeldi syılyqtardyń ıegeri, amerıkalyq akter, prodıýser, kınorejısser Nıkolas Keıdj qatysty.
