Qazaq eksportyn qoldaıtyn jańa baǵdarlama ázirlendi
Baǵdarlama «Qazaqstan-2050» strategııasynda belgilengen, atap aıtqanda 2015 jylǵy shıkizattyq emes eksport kólemin 2025 jylǵa qaraı eki esege ulǵaıtý jónindegi strategııalyq maqsattarǵa qol jetkizýge baǵyttalǵan.
Ulttyq ekonomıka mınıstri Tımýr Súleımenovtiń sózine qaraǵanda, eksporttyq strategııa boıynsha jumys barysynda Qazaqstannyń sońǵy 10 jyldaǵy eksportyna taldaý jasaldy.
Osy oraıda eksporttyq operatsııalarǵa yqpal etetin ulttyq zańnamanyń normalary men eksporttaýshylardy qoldaýdyń qazirgi sharalary, Qazaqstannyń halyqaralyq kelisimderi zerdelendi. Sonymen qatar sheteldegi eksportty qoldaýdyń halyqaralyq tájirıbesi qarastyryldy.
Atalǵan qujatta satý naryǵyn bólý arqyly taýarlar men qyzmet kórsetýler boıynsha perspektıvalyq «eksport sebetin» anyqtaý kózdelýde. Eksport sebetine eksporttalyp jatqan nemese eksporttaýǵa usynylǵan jeti saladan 116 taýar engizildi.
Mınıstrdiń atap ótýinshe, taýarlardy satý men qyzmet kórsetýlerdiń perspektıvalyq naryǵy retinde 27 el anyqtaldy. Baǵdarlama eksporttaýshylar úshin qarjylyq jáne qarjylyq emes qoldaý sharalaryn kórsetýdi, sondaı-aq eksporttyń damýyna kedergi keltiretin bógetterdi joıýdy kózdeıdi.
«Qazaqstan Respýblıkasynda eksport jasaý rásimderin ońtaılandyrý aıasynda taýarlardy elektrondyq deklaratsııalaýdy keńinen paıdalanýdy jedeldetý qajet. Bul aıtarlyqtaı bastapqy logıstıkalyq jaǵdaıda tıimdi jáne kedendik resimdeý shyǵyndaryn qysqartýǵa múmkindik beredi», - dedi mınıstr.
