Qazaq dúnıetanymynda ana beınesi qashanda aıryqsha qasterlengen — Balaeva
ASTANA. KAZINFORM — Búgin, mamyr aıynyń ekinshi jeksenbisinde, elimizde Analar kúni atap ótiledi. QR Premer-mınıstriniń orynbasary — Mádenıet jáne aqparat mınıstri Aıda Balaeva analar kúnine oraı quttyqtaý joldady.
Onyń sózinshe, júrekke jylý uıalatatyn, meıirim men mahabbatqa, alǵys pen qurmetke toly bul mereke bizge ómir syılaǵan, aq sútimen áldılep, aıaly alaqanymen mápelegen, sheksiz súıispenshiligi men qamqorlyǵyn arnaǵan asyl jandarǵa arnalǵan.
— Ana — ár adam úshin eń qymbat uǵym. Meıirimniń bastaýy, izgiliktiń shýaǵy, otbasynyń berekesi men urpaq tárbıesiniń altyn dińgegi. Qazaq dúnıetanymynda ana beınesi qashanda aıryqsha qasterlengen. Ananyń aqyly men ónegesi, sabyry men meıirimi arqyly urpaqtan urpaqqa qurmet, izet, janashyrlyq, jaýapkershilik sııaqty asyl qundylyqtar jalǵasyp keledi. Bul qundylyqtar — halqymyzdyń rýhanı tutastyǵy men eldigimizdiń berik negizi, — dedi Balaeva.
Mádenıet jáne aqparat mınıstri atap ótkendeı, búginde Qazaqstanda ana men balany, otbasy ınstıtýtyn qoldaýǵa baǵyttalǵan memlekettik saıasat júıeli túrde júzege asyrylyp keledi. Áleýmettik qoldaý sharalary jetildirilip, mektepke deıingi bilimniń qoljetimdiligi artyp, ana men bala densaýlyǵyn qorǵaý júıesi nyǵaıtylyp jatyr. Áıelderdiń eńbek etýine, kásibı damýyna jáne otbasylyq mindetterimen úılesimdi ómir súrýine jaǵdaı jasalyp keledi. Jaýapty ata-ana mádenıetin qalyptastyrýǵa baǵyttalǵan bastamalar qolǵa alynyp, Otbasyn qoldaý ortalyqtarynyń jelisi keńeıýde. Sonymen qatar on jyldan astam ýaqyt boıy konsýltatıvtik-keńesshi organ retinde Analar keńesi de mańyzdy jumys atqaryp jatyr.
— Osy aıtýly kúni barsha analarǵa danalyǵy, tózimi, meıirimi men aq nıeti úshin shyn júrekten alǵys aıtamyn. Analarymyz aman, shańyraqtarymyz shattyqqa toly bolsyn! Anamyzben birge ótkizgen árbir sáttiń qadirin tereń sezindiretin merekemen barshańyzdy shyn júrekten quttyqtaımyn! Otbasylaryńyzǵa jylýlyq, mahabbat, bereke-birlik pen amandyq tileımin! — dep quttyqtady mınıstr.
Buǵan deıin habarlanǵandaı, Analar kúni — mamyr aıynyń ekinshi jeksenbisinde AQSh, Kanada, Germanııa, Italııa, Túrkııa, Japonııa, Brazılııa jáne Aýstralııa syndy 20-dan astam memlekette toılanady. Qazaqstanda da ana mártebesin aıqyndaıtyn bul kún erekshe mánge ıe.
