Qazaq dep soqqan uly júrek toqtady - qazaqstandyqtardyń ǵalamtor arqyly Gerold Belgermen baquldasýy
Qazaqstan Prezıdenti Nursultan Nazarbaev belgili jazýshy Gerold Belgerdiń qaıtys bolýyna baılanysty onyń otbasyna kóńil aıtý jedelhatyn joldady. Onda Memleket basshysy kóńil aıta otyryp, jazýshynyń dúnıe salǵany týraly habardy kúızele qabyldaǵanyn, búkil Qazaqstan mádenıetiniń aýyr qazaǵa dýshar bolǵanyn atap ótti.
«Gerold Karlovıchtiń Qazaqstanǵa degen sheksiz súıispenshilikpen órilgen ómiri shynaıy patrıotızmniń úlgisi bolyp sanalady. Onyń shyǵarmashylyq murasy bizdiń mádenıetimizdiń baǵa jetpes ıgiligine, al ómir jolyndaǵy rýhanı ar-namys qaǵıdattary ár kezeńniń urpaqtaryna jiger beretin baǵyt-baǵdarǵa aınaldy», - dep atap ótken Qazaqstan Prezıdenti.
Qazaqstan qoǵamy da G.Belgerdiń qazasyna qabyrǵalary qaıysa otyryp, ǵalamtor arqyly onymen baquldasyp, qalamgerdiń qazaq halqyna degen zor mahabbatyn, Otanǵa degen súıispenshiligin jyly lebizderimen eske alýda.
QazAqparat oqyrman nazaryna solardyń birparasyn usynady.
Ámirova Gúlbaný: «Orny tolmas qaza. Taǵy bir jaqsy adam ómirden ozdy. Aldynan jarylqasyn...».
Amangeldi Keńshilikuly : «Geraǵam (Gerold Belger) dúnıeden ótti. Úlken azamat edi. Ol kisiniń úıinde bolyp, talaı syrlasqan kezderim esime túsip otyr. Endi Geraǵańdaı azamat týmaıdy».
Muhıden: «Naǵyz qazaq qazaq emes, naǵyz qazaq Geraǵa! Imandy bolsyn!».
Erlan Ámirbekov: «Ulty nemis bolsa da, júregi qazaq bolǵan, qazaq tiliniń bolashaǵyna qazaqtan beter alańdaǵan aǵamyzdyń jany jánnatta bolsyn!».
Jansaıa Baıbolova : «Imany serik bolsyn! Kúndeliktegi jazbalarynan shynshyl, batyldyǵyn tanyp, úlgi tutýshy edim. Jany jannatta bolsyn!».
Baqytbol Berimbaı : «Imandy bolsyn asyl Geraǵamyz! Shynynda birtýar adamdar bolady! Mysaly Abaı Qunanbaıulyndaı dana, Maǵjandaı aqyn, Shámshideı sazger, qaıtip týmaıdy. Muhtar Áýezov qaıtys bolǵanda Ǵabıt Músirepov aǵamyz bylaı depti:"At tuıaǵyn taı basar» degen maqaldyń esh máni qalmady. Áýezovtaı tulpardyń tuıaǵyn esh taıyń basa almaıdy" dep kúńirenipti... Biraq úmit te úzýge bolmaıdy."Úmitsiz shaıtan", Maǵjandaı "Men jastarǵa senemin" degenimiz de jón shyǵar».
Sharkúl Ázimbaeva : «Eh, jalǵan dúnıe-aı! Ol kisiniń de kezegi kelip kalǵan eken goı! Amalyń bar ma, asyldar shetinen ketip jatyr, kelmeske! Baqul bolǵaı!».
Erbolat Qoshqarbaev : «Baqul bol, Geraǵa! "Qazaqstandyq ult degendi bilmeımin - qazaq ultyn ǵana moıyndaımyn" degen Gerold Belger de ómirden ozdy...».
Esbol Mahısov : «Bárimiz de ajaldy pendemiz ǵoı, biraq qazaq halqyn osy Geraǵamyzdaı qorǵaǵan ózge ult ókili joq shyǵar? Otanyna, sol Otanynyń aýasy men topyraǵyna, dám-tuzy men nan-sýyna, turǵylyqty halyqtyń keń peıil júregi men darhan kóńiline, bir sózben aıtsaq Qazaq rýhyna adal bolǵan, nemis ultynan shyqsa da, jany naǵyz qazaq adam edi. Janyń jánnatta bolsyn aǵa!».
Ábdiraıym Omarov : «Qazaq áste arda ulynan aıryldy. Muny túsinýge qazaqtyń júregi jeter me eken? Uldaryn ógeısite alatyn ult, ulylaryn ulyqtap tura almaıdy, degenim ǵoı. Qaıǵyǵa ortaqpyn. Gerold aǵamyzdy baqıǵa jiberip, tek ýaqytty enshimizde qaldyrdyq. Bir jetimge sanymyzdy arttyryp. Bir kem dúnıe».
Kenjebaı Ahmetov : «Ger-aǵa Uly qazaqqa aınalǵan tulǵa ǵoı! Jany jánnatta bolǵaı!».
Esterińizge sala keteıik, belgili jazýshy, aýdarmashy, ádebıettanýshy Gerold Belger 81 jasyna qaraǵan shaǵynda keshe kúndizgi saǵat 13:00 shamasynda Ortalyq klınıkalyq aýrýhanada qaıtys boldy.
Jazýshy Reseıdiń Saratov oblysynda 1934 jyly 28 qazanda dúnıege kelgen.
1941 jyly Stalınniń jarlyǵymen KSSR-daǵy barlyq nemistermen birge Qazaqstanǵa, qazaq aýylyna (SQO-daǵy Ysqaq Ybyraev aýyly) jer aýdaryldy. Bul jerde jas Gerold qazaq tilin úırenedi.
Qazirgi Soltústik Qazaqstan oblysy Shalaqyn aýylynda qazaq orta mektebinde oqydy. Mektepti altyn medalmen bitirgen.
Abaı atyndaǵy Qazaq pedagogıka ınstıtýtyn jáne aspırantýrasyn támamdady. Shyǵarmalaryn nemis, orys, qazaq tilderinde jazǵan.
1958-1960 jyldary - Jambyl oblysy Baıqadam keńsharynyń orta mektep muǵalimi. 1963-1964 jyldary - «Juldyz» jýrnalynyń ádebı qyzmetkeri. 1964 jyldan shyǵarmashylyq jumysta bolǵan. 1992 jyldary nemis tilinde shyǵatyn «Fenıks» almanahy bas redaktorynyń orynbasary qyzmetterin atqarǵan.