Qazaq dástúrin oıyn arqyly tanytqan oqýshy fınalǵa joldama aldy

ASTANA. KAZINFORM – Aqtaýlyq oqýshy Esbol Azan qazaq halqynyń ulttyq salt-dástúrlerin nasıhattaıtyn «SARDAR» atty 3D beıneoıyn ázirlep, 830 qatysýshy baq synaǵan ulttyq AI-jobalar baıqaýynyń fınalyna joldama aldy.

Jas IT mamany bul týraly «Jibek Joly» telearnasynyń «Búgin Live» baǵdarlamasynda málim etti.

Onyń aıtýynsha, oıynnyń negizgi sıýjeti qazaqtyń baı mádenıeti men tarıhyn tanystyrýǵa baǵyttalǵan. Joba qazirgi jas býynnyń boıynda patrıottyq sezimdi qalyptastyryp, ulttyq qundylyqtarǵa degen qyzyǵýshylyǵyn arttyrýdy kózdeıdi.

– Meniń oıymsha, óte tıimdi. Qazirgi tańda men ózimniń úıdegi inimnen de, basqa balalardan da baıqap júrmin: olar oıynǵa qyzyǵyp oınaı otyryp, qazaqtyń mádenıetin de úırene alady, – dedi Esbol.

Sondaı-aq ol jobanyń balalarǵa arnalǵan nusqasy ázirlenip, al bolashaqta eresekterge arnalǵan keńeıtilgen nusqasyn shyǵarý josparlanyp otyrǵanyn jetkizdi.

Aıta keteıik, kóktemmen birge keletin Naýryz – jańarý men birliktiń sımvoly. Sońǵy jyldary mereke tek bir kúnmen shektelmeı, onkúndik formatta atalyp keledi.