Shymkentte ártúrli ult ókilderi qazaq dastarhanynan dám tatty
ShYMKENT. KAZINFORM - Búgin Shymkentte qalalyq Qazaqstan halqy Assambleıasy janyndaǵy etnomádenı birlestikterdiń atsalysýymen dástúrli «Qazaq dastarhany» festıvali ótti.
Etnos ókilderin qoǵamdyq bastamalarǵa uıystyrý arqyly memleket quraýshy qazaq halqynyń mańaıyna toptastyrý, ultymyzdyń qonaqjaılyq, syılastyq syndy ıgi dástúrin dáripteýdi kózdegen ıgi is-sharaǵa qalalyq ishki saıasat jáne jastar isteri jónindegi basqarmasynyń basshysy, qalalyq QHA janyndaǵy Aqsaqaldar keńesi, Analar keńesi syndy qoǵamdyq qurylymdarynyń jetekshileri men músheleri, zııaly qaýym, qalalyq etnomádenı birlestikterdiń tóraǵalary men belsendileri jáne BAQ ókilderi qatysty.
Ótken jyldary et asýdan, qazaqtyń ulttyq taǵamdaryn ázirleýden jáne ultymyzdyń umyt bola bastaǵan taǵamdaryn daıyndaýdan ózara saıysqa túsken etnos ókilderi bıyl qazaq taǵamdarynan dastarhan jaıyp, qalyń kópshiliktiń nazaryna usyndy. Ortaq qazanda et asyp, ár ústel basyndaǵy qonaqtarǵa túrli ulttyq taǵamdar men tabaq tartý arqyly qazaqtyń salt-dástúri men dastarhan mádenıetin meńgergenin jurtshylyqqa pash etti.
Etnos ókilderin bir arnaǵa uıystyryp, mańyzdy qundylyqtardy dáripteıtin festıvaldiń mazmunyn tilge tıek etken qalalyq ishki saıasat jáne jastar isteri jónindegi basqarmasynyń basshysy atalǵan is-sharanyń jalpyulttyq qundylyqtardy óskeleń urpaq jadynda jańǵyrtýǵa septesetinin aıtty.
– Ótkenimiz ben búginimizdi salystyrǵan janǵa búgingi is-sharanyń mánin uǵý asa qıyn emes. Keńestik dáýirde qazaq eline jer aýdarylǵandar aldyńǵy býynnyń keń peıili men darhan dastarhanynyń arqasynda osy kúnge aman-esen jetti.
Syılastyq, dostyq, qonaqjaılyq – bul uǵymdar barsha otandastarymyzdyń dúnıetanymy men ómir saltynyń negizinde jatyr. Osyndaı qundylyqtardyń arqasynda bizdiń ortaq úıimiz – Qazaqstanda beıbitshilik pen qoǵamdyq kelisim saqtalyp otyr, - dedi Aıgerim Jumaǵulova.
Dastarhan basynda bata bergen qalalyq QHA janyndaǵy Aqsaqaldar keńesiniń tóraǵasy Orynbaı Rahmanberdıev «Qazaq dastarhany» festıvaliniń maqsaty – as iship, ydys bosatý emes. Búginde barshamyzdyń Qazaqstan dep atalatyn memlekette tatý-tátti ǵumyr keship jatqanymyzdy jurtshylyqqa jetkizý. Bir qazannan as iship, bir dastarhan basynda basqosyp, ózara syılastyqpen, tatýlyqpen turyp jatqanymyzdy kórsetýdi kózdeıtinin basa aıtty.
Festıval barysynda qalalyq «Salt-dástúr jáne ádet-ǵuryp ortalyǵynyń» mamandary ulttyq qazaqtyń salt-dástúri men ulttyq taǵamdary týraly jan-jaqty maǵlumat berdi.
Bıyl atalǵan is-sharaǵa alǵash ret qatysqan qalalyq «Assambleıa jastary» uıymynyń ókili Nýralı Gýseınov «Qazaq dastarhany» festıvali kóńilinen shyqqanyn aıtty.
– Úlken atam bizge qazaq halqyna qurmet kórsetý týraly jıi aıtatyn. Jer aýdarylyp, Qazaqstanǵa kelgende qazaqtardyń baýyryna tartyp, dastarhanyndaǵy nanymen, qurtymen bóliskenimen kóp eske alatyn. Іship-jeýden qınalǵanda qazaqtardyń úıine shaqyryp, mata dastarhanyn ashqanda árqaısymyzǵa bir-bir qurttan nemese bir úzim nannan tıip baqyttan basymyz aınalatyn deıtin.
Qazaq dastarhany – bereke bastaýy. Sebebi, qanshama ult pen ulysty demep, qolyndaǵy barymen bólisý kez kelgen halyqtyń qolynan kele bermeıdi. Óz basym qazaq eline, qazaq halqyna, qazaq dastarhanyna jáne qazaqtyń keń peıiline aıtar alǵysym sheksiz, - deıdi Nýralı Ahmaduly.
Aıta keteıik, Qazaqstan halqy Assambleıasynyń «Qazaqtaný» jobasy aıasynda qolǵa alynǵan «Qazaq dastarhany» festıvali alǵash ret 2015 jyly Shymkentte qalasynda bastaý alǵan bolatyn. Jyl saıyn túrli formatta ótetin festıval qalalyq assambleıanyń uıytqy bolýymen bıyl toǵyzynshy ret uıymdastyryldy.
