Qazaq dalasyndaǵy «Maýglı» týraly fılmniń tusaýy kesildi
ASTANA. QazAqparat - Elordadaǵy L.Gýmılev atyndaǵy Eýrazııa ulttyq ýnıversıtetinde rejısser Erkin Raqyshevtyń «Kókjaldar» fılminiń tusaýkeseri ótti, dep habarlaıdy «QazAqparat» HAA tilshisi.
Qalyń kórermenge jol tartqaly otyrǵan tyń týyndy qasqyrlardyń arasyna sińgen qazaq balasynyń ómiri týraly syr shertedi.
«Kınonyń aty «Kókjaldar» dep atalady. Onyń avtory «Jaraly sezim» dep jastardyń sezimin qozǵaǵan, «Jetimder» dep kóptiń kózine jas keltirgen, «Astanaǵa kóktem kesh keledi» dep keremet fılm túsirgen, Asharshylyq, Turar Rysqulov týraly derekti fılmderdi dúnıege ákelgen -rejısser Erkin Raqyshev. Fılmniń stsenarııin ekeýimiz jazyp shyqtyq. Týyndy kópke unaıdy degen senimdemin», - deıdi fılmniń stsenarııin jazǵan Ramazan Qurmanbaev.
Fılm jelisindegi oqıǵa qarapaıym qazaq otbasynyń basynda órbıdi. Erli-zaıyptylardyń Murat esimdi uldaryn úsh aıynda qasqyr urlap áketedi. Qanjylaǵan áke men sheshe qansha izdegenimen, balasyn taba almaıdy. Arada 20 jyldan ótkennen keıin qazaq dalasynda «Maýglıdiń» júrgeni týraly áńgime tarap, arnaıy qurylǵan top bir kezderi joǵalyp, qasqyrlardyń arasyna sińgen Muratty ustaý úshin jolǵa shyǵady.
Rejısser qazaqtyń keshegisi men búginin baılanystyra otyryp, fılm keıipkerleri arqyly qazaqtyń kókjaldy kıe tutatynyn kórsetken. «Ejelde ǵundardyń týynda qasqyrdyń beınesi bolǵanyn búgingi urpaq bile me eken», «Biz kók bóri ekenimizdi umytqan halyqpyz» degen keıipkerlerdiń aıshyqty sózderi tereń oıǵa batyra túsedi. Murattyń rólin fılmde akter Jandos Isaev somdaǵan.
