«Qazaq dalasynyń ertegileri» - Qazaqstan men Chehııa arasyndaǵy mádenı kópir
PRAGA. KAZINFORM – Pragadaǵy Petrshın qalalyq kitaphanasynda cheh tilindegi «Qazaq dalasynyń ertegileri» kitabynyń tusaýkeseri ótti. Qazaq halyq ertegileriniń jınaǵyna Er Tóstik batyrdyń bastan keshken oqıǵalary, Aldar Kóseniń qýlyqtary men Jalmaýyz kempirdiń zulymdyqtary sııaqty qazaq folklorynyń qazynasynda erekshe oryn alatyn tanymal sıýjetter endi. Kitaptyń ıllıýstratsııasyn T.Júrgenov atyndaǵy qazaq ulttyq óner akademııasy janyndaǵy mekteptiń jáne Behıne qalasyndaǵy (Chehııa) Óner kolledjiniń túlegi – jas qazaq sýretshisi Anelııa Bekbas salǵan.
Qazaqstannyń Chehııadaǵy Elshisi Baqyt Dúısenbaev óz sózinde bul jobanyń Qazaqstan men Chehııa arasyndaǵy mádenı baılanystardy nyǵaıtýdaǵy mańyzdylyǵyn atap ótti. Qazaq dıplomaty urpaqtan-urpaqqa aıtylyp kele jatqan ertegiler balalarǵa ómirlik mańyzy bar sabaqtar beretinin, qııaldaryn damytyp, bolashaq ertegishiler men sýretshilerdi shabyttandyratynyn aıtty. B.Dúısenbaev bul joba Qazaqstan men Chehııa halyqtaryn jaqyndastyryp, dostyǵyn nyǵaıtatynyna senim bildirdi.
Cheh tarapynan qonaqtar aldynda Praga 6 mýnıtsıpaldy aýdany basshysynyń keńesshisi Zdenek Hlınskı sóz sóıledi.
«Bul ertegiler – tek qana áńgimeler emes, bul biz úshin Qazaqstan mádenıeti, sondaı-aq qazaqtardyń salt-dástúri men turmys-tirshiligi týraly kóbirek bilýge múmkindik», - dedi Hlınskı.
Ol halyqtar arasyndaǵy qarym-qatynas aıasyn keńeıtetin osyndaı mádenı jobalardyń mańyzdylyǵyn erekshe atap ótti.
Іs-sharaǵa Chehııanyń mádenıet jáne bilim mınıstrlikteriniń, akademııalyq jáne mádenı orta ókilderi, sondaı-aq qazaq dıasporasy men stýdentter qatysty.
Kezdesýdiń basty qonaqtary – bastaýysh synyp oqýshylary boldy. Olar úshin Qazaqstan týraly qyzyqty tanystyrylym uıymdastyrylyp, qazaq mýltıplıkatorlarynyń «Shyraq» fılmi kórsetildi. Sodan keıin balalar vıktorınaǵa qatysyp, tapqyrlyqtaryn tanytty. Kishkentaı qatysýshylardyń árqaısysyna syılyqqa ertegi kitaby men qazaqstandyq shokolad tabys etildi.
Baǵdarlama aıasynda dombyramen mýzykalyq shyǵarmalar oryndalyp, qonaqtarǵa qazaq merekesiniń kóńil-kúıine bólegen ulttyq taǵamdar usynyldy.
Іs-shara Qazaqstan men Chehııa arasyndaǵy mádenı yntymaqtastyqtyń mańyzdy oqıǵasyna aınalyp, dostyq qarym-qatynastardy ári qaraı nyǵaıtýǵa degen zor qyzyǵýshylyqty kórsetti.
