Qazaq dalasynda týǵan alǵashqy kerqulan qulyndaryna at qoıyldy
ASTANA. KAZINFORM — Qazaqstan dalasynda dúnıege kelgen alǵashqy kerqulan (Prjevalskıı jylqysy) qulyndary endi Botaı jáne Tumar dep atalady, dep habarlaıdy Orman sharýashylyǵy jáne janýarlar dúnıesi komıtetiniń baspasóz qyzmeti.
Olar bıyl jazda «Altyn Dala» memlekettik tabıǵı rezervaty aýmaǵyndaǵy «Álibı» jabaıy tuıaqtylardy reıntrodýktsııalaý ortalyǵynda dúnıege keldi. Búginde qulyndar bir aıdan asty. Kún ótken saıyn belsendi bolyp, aınalany zerttep, óz úıirimen birge júrýge birtindep beıimdelip keledi.
Botaı — Tessa bıeniń qulyny, al Tumar — Ýmbranyń tóli. Eki bıe de Qazaqstanǵa 2024 jyly Berlın Tırparkinen ákelingen jáne alǵash ret ana atandy.
Qulyndardyń esiminde de erekshe mán bar. Botaı ataýy adam men jylqy arasyndaǵy qarym-qatynas tarıhynda mańyzdy iz qaldyrǵan Botaı arheologııalyq mádenıetimen baılanysty. Al Tumar — qazaq tanymyndaǵy qorǵanysh pen amandyqtyń nyshany.
— Botaı men Tumardyń dúnıege kelýi — «Jabaıy jylqylardy qaıtarý» jobasyndaǵy jańa kezeń. Alǵashqy kerqulandardyń Qazaqstanǵa kelýi olardyń tarıhı mekenine oralýynyń bastamasy bolsa, endi qazaq dalasynda týǵan tólder jańa urpaqtyń qalyptasa bastaǵanyn bildiredi. Qazir Botaı men Tumar mamandardyń turaqty baqylaýynda ósip keledi. Alda olardy keń dala, úıirdegi ómir jáne ózdiginen tirshilik etýge úırenetin uzaq jol kútip tur, — delingen komıtet taratqan aqparatta.
Osyǵan deıin Almaty haıýanattar baǵynda kerqulannyń Qurbankúl atty bıesi qulyndaǵanyn jazǵanbyz. Qulynǵa Jelmaıa dep at qoıyldy. Bul — Qurbankúldiń ekinshi tóli.
