Qazaq dalasynda taǵy bir Prjevalskıı jylqysynyń qulyny dúnıege keldi
ASTANA. KAZINFORM – Qazaqstanda Prjevalskıı jylqysynyń ekinshi qulyny dúnıege keldi. Bul joly Ýmbra esimdi bıe qulyndady.
Bul Prjevalskıı jylqysyn tarıhı mekenine qaıtarý jónindegi halyqaralyq baǵdarlama aıasynda Qazaqstanda týǵan ekinshi tól. Alǵashqy qulyn 22 tamyzda «Altyn Dala» memlekettik tabıǵı rezervaty aýmaǵyndaǵy «Álibı» jabaıy tuıaqty janýarlardy reıntrodýktsııalaý ortalyǵynda dúnıege kelgen.
Qazir Ýmbra men qulyn birge. Mamandar olardyń jaǵdaıy men minez-qulqyn baqylap otyr.
Ekinshi tóldiń dúnıege kelýi Qazaqstanǵa ákelingen Prjevalskıı jylqylarynyń dala jaǵdaıyna beıimdelip, tabıǵı jolmen kóbeıip jatqanyn kórsetedi. Bul aldaǵy ýaqytta tabıǵı ortada ózdiginen kóbeıetin turaqty popýlıatsııa qalyptastyrý úshin mańyzdy.
Prjevalskıı jylqysyn Qazaqstanǵa ákelý 2024 jyly bastaldy. Alǵashqy jyly Eýropadan jeti jylqy jetkizildi. 2025 jyly taǵy jeti, 2026 jyly segiz jylqy ákelindi.
Prjevalskıı jylqysy — Eýrazııada saqtalǵan jabaıy jylqylardyń sońǵy túri. HH ǵasyrda ol jabaıy tabıǵattan joıylyp ketkenimen, haıýanattar baqtarynda saqtalyp, keıin halyqaralyq baǵdarlamalar arqyly tabıǵı mekenine qaıta jiberile bastady. Qazaqstan da qazir osy túr qaıta jersindirilip jatqan elderdiń qatarynda.
Joba Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti, Praga haıýanattar baǵy, Qazaqstan bıoalýantúrlilikti saqtaý qaýymdastyǵy (QBSA), Frankfýrt zoologııalyq qoǵamy, Nıýrnberg haıýanattar baǵy, Berlın Tırparki jáne «Hortobad» ulttyq parkiniń yntymaqtastyǵy negizinde, Leıbnıts atyndaǵy haıýanattar baǵy men jabaıy tabıǵatty zertteý ınstıtýtynyń (IZW) ǵylymı jáne veterınarııalyq qoldaýymen júzege asyrylyp jatyr.
