Qazaq tsırki «Jańa jyldyq safarı» atty jańa reseılik-qazaqstandyq baǵdarlamanyń tusaýyn kesti (FOTO)
ALMATY. QazAqparat- Búgin Almatyda Qazaq memlekettik tsırki Jańa jyldyq safarı» dep atalatyn jańa reseılik-qazaqstandyq baǵdarlamanyń tusaýyn kesti.
Múgedek balalarǵa, áleýmettik turmysy tómen jáne kóp balaly otbasylardyń balalaryna, balalar úıleriniń tárbıelenýshilerine arnalǵan bul shoýǵa belgili reseılik janýarlardy úıretýshi, Reseıdiń eńbek sińirgen ártisi Rústem Matchanovtyń «Jyrtqyshtar ımperııasy» baǵdarlamasynyń úzdik nómirleri kórsetildi. Olar: «Úıretilgen jolbarystar», «Úıretilgen aıýlar» jáne «Úıretilgen maımyldar».
Sondaı-aq, búgingi kórsetilimde ózderiniń tańǵajaıyp eptiligi men sándiligin kórsetýge úıretilgen eshkilerdi tsırk óneriniń ataqty qazaqstandyq áýletiniń ókili Ásel Beısekova alyp shyqty. Óziniń túlekteri - tańǵajaıyp kepterlerdiń ushýlary men trıýkterin Almaty tsırkiniń belgili artısi Irına Şadko kórsetti. Óte kúrdeli qol ekvılıbrin halyqaralyq tsırk konkýrstary men festıvalderiniń birneshe ret júldegeri Anna Demıdova tamasha pash etti.
Sonymen qatar, Qazaq memlekettik tsırkiniń ataqty artısteriniń jarqyn, ádettegiden ózgeshe, festıvaldyq nómirleri kórsetildi. Olar: VIII «Azııa jańǵyryǵy» Halyqaralyq tsırk óneri festıvaliniń «Kúmis marapatynyń» ıesi Alekseı Hramenkovtyń «Lazerlik shoýy», Halyqaralyq tsırk óneri festıvaliniń laýreaty Olga Demıdovanyń basshylyǵymen «Aýadaǵy bambýk» nómiri, XVIII «Shabyt» halyqaralyq jastar shyǵarmashylyǵy festıvaliniń Gran prı syılyǵynyń jeńimpazy Serik Býrashevtiń «Akrobattyq jol» nómiri jáne QR Tuńǵysh Prezıdenti Qory syılyǵynyń laýreaty Rýslan Faızýlınniń «Batyldyq dońǵalaǵy» nómiri.
«Jańa jyldyq safarı» baǵdarlamasy 2015 jyldyń 19 jeltoqsany men 2016 jyldyń 10 qańtary aralyǵynda ótedi.
