Qazaq tsırki 30 jyldan keıingi tól týyndysyn ertegiden bastady
ALMATY. QazAqparat - Qazaq memlekettik tsırki 30 jyldan keıin óz ártisteriniń qatysýymen jasalǵan tól tsırktik baǵdarlamasyn qazaq ertegisinen bastady, dep habarlaıdy QazAqparat tilshisi.
Búgin Almatyda EKSPO-2017 kórmesine arnalǵan Qazaq memlekettik tsırki ázirlegen «Er Tóstik» lazerlik sýper shoýynyń tusaýkeseri ótti. Atalǵan baǵdarlama 22 shilde men 20 tamyz aralyǵynda qoıylatyn bolady.
«Sońǵy ret bizdiń tsırkimiz óz baǵdarlamasymen 1972 jyly gastrolǵa shyqqan. 16 jyl sol baǵdarlamasymen gastrol jasaǵan. Sodan keıin óz baǵdarlamasymen gastrolǵa shyqpaǵan. Endi «Er Tóstikti» Almatyda kórsetip bolǵannan keıin, Shymkent qalasyna saparlaımyz, ary qaraı Qazaqstan boıynsha qoıylymdy kórsetý josparlanyp otyr. Aldaǵy dúısenbi kúni Qazaq memlekettik tsırkiniń qurylǵanyna 47 jyl tolady. Keńes odaǵy kezeńinde qazaqy naqyshtaǵy kórsetilim úzdik bolyp tanylǵan. ıAǵnı, ol baǵdarlamaǵa tek Qazaq tsırkiniń ártisteri men ónerpazdary ǵana qatysqan. Osy 30 jylǵy úzlisten keıin mine, alǵash ret óz ártisterimizdiń qatysýymen ázirlengen tól baǵdarlamamyzdy halyqqa usynyp otyrmyz», dedi «Er Tóstik» shoýynyń qoıýshy rejısseri Marına Redko.
Baǵdarlamada aıýlar, eshkiler, ıtter kógershinder óner kórsetti. Stsenarıı boıynsha Er Tóstiktiń jolynda ózge de keıipkerler Samruq qus, Shalquıryq at, aq peri, dala elftary kezdesti. Stsenarıı jelisi boıynsha, jaýyzdyqty jeńip shyǵatyn Er Tóstik eń sońynda armanyna jetip, arýyna qosylady. Marına Redko Qazaq Memlekettik tsırki ne úshin Er Tóstik ertegisin tańdaǵanyn aıtty.
«Qazirgi zamanda balalar sheteldiń keıipkerlerin tanıdy da óz qaharmandaryn bilmeıdi. Biz «Er Tóstik» arqyly ulttyq qundylyǵymyzǵa balalardyń da nazaryn aýdarǵymyz keldi», - deıdi M.Redko.
«Er Tóstik» qoıylymynda Kenjekeı, Er Nazar, Qarashash, Bektory, Mystan Kempir syndy keıipkerler balalardyń tanymyn qııal-ǵajaıyp ertegi álemine jeteleıdi. Teatraldy qoıylymnyń uzaqtyǵy 2,5 saǵat.
Marına Redkonyń aıtýynsha, «Er Tóstik» lazerlik shoýynyń oryndaýshylary 2-6 shilde aralyǵynda Astanada ótken «Azııa jańǵyryǵy -2017» H Halyqaralyq tsırk óneri festıvalinde «Altyn» júldeni jeńip aldy. Shoýdy ótkizýge 100-den adam qatyssa, manejde 65 adam óner kórsetedi.
