Qazaq boksynyń jetistikteri entsıklopedııasy jaryqqa shyqty
ASTANA. 22 shilde. QazAqparat /Jasulan Amanbaıuly/ - 23-30 shilde aralyǵynda Astanada ótetin jastar arasynda bokstan Álem chempıonaty qarsańynda elimizdiń boks qaýymdastyǵy qazaq boksynyń jetistikteri entsıklopedııasyn basyp shyǵardy.
Búgin elordada ótkizilgen baspasóz máslıhaty barysynda qaýymdastyq ókilderi atalǵan entsıklopedııanyń tusaýyn kesti. QBQ-nyń Atqarýshy dırektory Danııar Ábilǵazınniń atap ótkenindeı, atalmysh estelik basylym AIBA ókilderine, shetel qonaqtary men delegattaryna, chempıonat qatysýshylaryna, qazaqstandyq boks jankúıerleri men BAQ ókilderine tartý etiledi.
«Qazaqstannyń boks federatsııasy arnaıy jastar arasynda bolatyn bokstan Álem chempıonaty qarsańynda qazaqstandyq bokstyń jetistikteri entsıklopedııasyn shyǵardy. Bul ekinshi basylym. Chempıonattan soń, shamamen 30 shilde - 1 tamyz kúnderi Halyqaralyq áýesqoı boks qaýymdastyǵynyń Atqarýshy komıteti óziniń otyrysyn ótkizedi. Sol kezde osy kitap Atqarýshy komıtettiń barlyq múshelerine, boks súıer qaýymǵa taratylady», - deıdi ol.
Sonymen qatar QBQ osy sharaǵa ádeıilep qazaqstandyq bokstyń jaryq juldyzdary men Astana qalasy týraly 2 fılm túsirgen.
Eske sala keteıik, 23-30 shilde aralyǵynda Astanada jastar arasynda bokstan Álem chempıonaty ótedi. Jarysqa álemniń 50 elinen 500-ge tarta qatysýshysy keledi dep kútilýde.
