Qazaq boksynyń negizin qalaýshy Shoqyr Bóltekuly týraly derekti fılm túsirildi
ASTANA. QazAqparat - Almatyda qazaq boksynyń negizin salýshy Shoqyr Bóltekulynyń 100 jyldyǵyna oraı azamatty eske alý sharasy bolyp ótti. Oǵan Shoqyr Bóltekulynyń tól shákirti Serik Ábdenálıev, Olımpıada chempıony Ermahan Ybraıymov, «Alash praıd» jekpe-jek klýbynyń jetekshisi Danııar Qasqaraýov sııaqty elge tanymal azamattar qatysty.
Eske alý sharasy barysynda, Shoqyr Bóltekulyna arnalǵan derekti fılm dúıim jurttyń nazaryna usynyldy. Bul fılmniń túsirilim jumystaryna qatysyp, jaryqqa shyǵarǵandardyń qatarynda S. Berdiqulov atyndaǵy syılyqtyń laýreaty Raýan Oqas, sport jýrnalısteri Asqar Aǵataev, Serik Noıanbaıuly, Madııar Arystanbaevtardy erekshe atap ótýge bolady. Derekti fılm Shoqyrdyń ózi týǵan Jarmysh aýylynda, balalyq shaǵy ótken Fort-Shevchenkoda túsirilgen.
Týyndydaǵy epızodtardyń birinde Shoqyr Bóltekulynyń beınesin tanymal boksshy Janqosh Turarov somdaǵan. «Fılmniń ózi jaqyn ýaqytta otandyq telearnalardyń birinen kórermenderdiń nazaryna usynylady. «Shoqyr Bóltekuly sııaqty biregeı tulǵanyń 100 jyldyǵyn atap ótýdi ózimizge paryz sanap, qolymyzdan keletini derekti fılmdi túsirip shyqtyq. Osy oraıda bizge qoldaý kórsetken Mańǵystaý boks federatsııasyna erekshe alǵys bildiremiz. Qarasha aıynda «Qazaq boksynyń atasy» atty týyndy kópshilik nazaryna tartý etiledi»,- dedi fılm stsenarıiniń avtory Serik Noıanbaıuly.
