Qazaq boksynyń negizin qalaýshy Sh.Bóltekuly men qazaqtyń tuńǵysh balerına-bıshisi N.Tapalovanyń eskertkish beıiti ashylady

Bul aqparatty Mańǵystaý oblystyq boks federatsııasy taratyp otyr.

«2010 jyldyń 17 shildesinde Almaty qalasyndaǵy Keńsaı zıratynda marqumdar Shoqyr Bóltekuly men onyń zaıyby Nursulý Tapalovanyń basyna turǵyzylǵan eskertkish-beıittiń ashylý rásimi ótedi. Beıit basyna el sporty men óneriniń qaıratkerleri, janashyrlary, BAQ ókilderi jıylyp, marqumdardy eske alyp, quran baǵyshtaıdy. Odan soń halqymyzdyń qos juldyzynyń árýaǵyna arnap as beriledi», delingen baspasóz habarlamasynda.

Sh.Bóltekuly 1916 jyly Mańǵystaý oblysynda dúnıege kelgen. Bokspen stýdent kezinde shuǵyldana bastaǵan ol qazaq jerinde áýesqoı boksty úıretýdi eń birinshi qolǵa alǵan ustaz. Qazaq boksynyń atasy atanǵan Sh.Bóltekuly - QR eńbek sińirgen jattyqtyrýshysy, KSRO sport sheberi atanǵan tuńǵysh qazaq.

Qazirgi tańda Shoqyr Bóltekulynyń esimin qurmetteý maqsatyndaǵy birqatar sharalar iske asyrylýda. Onyń atyndaǵy halyqaralyq týrnır dástúrli túrde uıymdastyrylyp keledi. Mańǵystaý oblysynyń Mańǵystaý aýdanynyń ortalyǵynda Sh.Bóltekulynyń atyndaǵy sport kesheni salynsa, Aqtaý qalasynda boksshylar klýby quryldy.

Nursulý Tapalova 1923 jyly Aqtóbe oblysynda dúnıege kelgen. 11 jasynda akademık Ahmet Jubanovtyń qamqorlyǵymen Almatyǵa bilim izdep kelip, ulttyq bılerdi naqyshyna keltire oryndaıtyn mamandardan tálim-tárbıe alǵan. N.Tapalova qazaq, qyrǵyz, ózbek, armıan, ıspan, orys jáne taǵy basqa da ulttardyń bılerin óz deńgeıinde, bıik talǵammen oryndaýshy bola bildi. Dúnıejúzine tanymal balet dúldúlderi Galına Ýlanova men Maııa Plısetskaıalarmen birge 40-shy jyldary Abaı atyndaǵy akademııalyq opera jáne balet teatrynyń sahnasynda «Baqshasaraı burqaǵy» spektaklinde óner kórsetip, ulttyq horeografııanyń qalyptasyp-damýyna zor úles qosty.