Qazaq boksynan úlken úmit kútemin - Azamat Qarlyǵashev
- Qazaqstandyq bylǵary qolǵap sheberleriniń dúnıejúzilik dodadaǵy nátıjesin qalaı baǵalaısyz?
- El quramasy sapyndaǵy boksshylar nátıjesi jaman emes. Tipti, ony jaqsy dep baǵalaýǵa negiz bar. Bul oraıda Qazaqstan boks federatsııasynyń eńbegi zor. Jaqynda federatsııa ulttyq qurama bas bapkeri qyzmetine Qaırat Sátjanovtyń ornyna Myrzaǵalı Aıtjanovty taǵaıyndady.
Meniń oıymsha, bul -durys sheshim. Qurama bapkerlerin aýystyryp otyrsaq, odan esh utylmaımyz. Budan buryn Serbııa astanasy Belgrad qalasynda ótken álem chempıonatynda bas bapker qyzmetin Qaırat Sátjanov atqardy. Onda da jaqsy kórsetkishke qol jetti.
Osyǵan uqsas jaǵdaı qazirgi álem chempıonatynda da baıqalyp otyr. Bul oraıda federatsııa, bapkerler quramy men sportshylardyń úlken eńbegin baıqaý qıyn emes.
- Boksshylardyń qazirgi kóńil-kúıi qalaı dep oılaısyz?
- Ózim bokstan álem chempıonatynda qola júldeger atanǵan edim. Sondyqtan jartylaı fınalǵa shyǵý - sportshylar úshin ońaı dúnıe emes. Ol fızıkalyq jaǵdaıdan góri moraldyq turǵyda kádimgideı júıkege salmaq salyp, kóńil kúıińe áser etedi. Men óz elimiz, sport mınıstrligi, federatsııa aldynda qandaı jaýapkershilik sezingenimdi umyta qoıǵan joqpyn.
- Tóreshiler máselesin qalaı baǵalaısyz?
- Bul jóninde aıtsaq, aldymen Sáken Bıbosynovtyń jekpe-jegi oıǵa oralady. Tóreshilerdiń atalǵan saıys pen ózge de jekpe-jekterde aqsap qalǵan tustary az bolǵan joq. Osy oraıda eki dúrkin Olımpıada chempıony Hýlıo Sesar La Krýsqa qatysty shyǵarylǵan sheshimdi aıtýǵa bolady.
- Sizdiń boljamyńyz boıynsha osy chempıonatta ulttyq qurama enshisine qansha júlde buıyrýy múmkin?
- Qazaqstandyq boksshylar «altyn» medal alyp jatsa, óte tamasha bolar edi. Meniń oıymsha, bizde kem degende úsh altyn, qalǵany kúmis medal bolýy tıis.
Alda - Olımpıada oıyndary. Sáken Bıbosynov áli de tehnıkalyq, ádemi, qazaq boksyn kórsetedi degen úmittemin.
Sondaı-aq, eresekter quramasyna qsylǵanyna kóp bola qoımaǵan Sanjar Táshkenbaı unaıdy. Ol - jaqsy boks kórsetip keledi, sezimtal boksshy. Onyń óte keremet bapkeri bar, Sanjardy óziniń balasyndaı jaqsy kóredi. Meniń oıymsha, bul boksshyny jarqyn bolashaq kútip tur. Ol jyldam, rıngte jaqsy qozǵalady, onyń keremet fýnktsıonaldy daıyndyǵy bar.
- Qazir mamandar sportshylardyń boksty júrgizý máneri ózgerdi dep esepteıdi. Oǵan kózqarasyńyz qalaı?
- Oǵan tolyq qosylamyn. Sońǵy ýaqytta bizdiń sportshylardyń boks júrgizý máneri ózgerip keledi. Qazaqstandyq bylǵary qolǵap sheberleri kásipqoılar sekildi saıysqa túsedi.
Aıtý kerek, boks ózgere bastady. Biz Bolat Jumadilov, Bekzat Sattarhanov, Ermahan Ibraımov, Serik Konaqbaev, Serik Sápıev sekildi boksshylardy umytpaýymyz tıis. Aıaqtaǵy jaqsy qozǵalys, jyldam jáne tehnıkalyq boks.
Bul - meniń sýbektıvti pikirim, qazir boksshylardy «sharshy alańǵa shyq ta, soqqy ber» degen qaǵıda boıynsha jartylaı kásipqoılar sekildi daıyndaıdy. Maǵan jekpe-jekti ótkizý barysynda kóbirek oıyn kórsetý máneri unaıdy.
Al Sanjar Táshkenbaı men aıtqan ádispen judyryqtasady. Sol sııaqty Sáken Bekbosynov pen Mahmýd Sabyrhan da sol tásildi ustanady. Jaqynda bul boksshylardyń juldyzy janyp, búkil el olardy qurmetteıdi dep úmittenemin.
- Áńgimeńizge raqmet.