Qazaq boksshysynyń sporttyq jolyna arnalǵan «Jol» atty fılm túsirilýde

Osyǵan oraı keshe elordada baspasóz máslıhatyn ótkizgen fılmniń rejısseri Asqar Uzabaevtyń aıtýynsha, kórkem fılmdegi basty rólderge bekitilgen 21-23 jas aralyǵynda jigitter kásibı akterler emes. Olar elimizde ótkizilgen kastıng arqyly iriktelgen. Tájirıbeli akterlermen qatar boks ónerinde aty álemge tanylǵan Serik Qonaqbaev, Ermahan Ybyraıymov syndy sportshylardy da tartýdy josparlap otyrǵandyqtaryn jasyrmaǵan rejısser ázirshe fılmge tanymal bylǵary qolǵap sheberlerinen naqty kimderdiń túsetindigin qupııa saqtaýdy jón kóripti.

Belgili bir sportshynyń ómirbaıanyna emes, sharshy alańnyń shańyn shyǵaryp, dúbirli dodalarda zor jetistikke jetken barsha qazaq sportshylarynyń jıyntyq obrazynan týyndaıtyn fılmdi túsirý jumystary elimizben qatar Germanııa, Frantsııa syndy birqatar Eýropa memleketterinde de júrgizilmek. Búginde elorda tórinde ótip jatqan bokstan jasóspirimder arasyndaǵy álem chempıonatyn da tıimdi paıdalanýdy kózdegen túsirýshi top «Qazaqstan» sport kesheninde fılmniń keıbir kórinisterin túsirýdi qolǵa almaq.

A.Uzabaevtyń atap ótýinshe, fılm 2012 jyldyń qańtar aıynda tolyǵymen túsirilip bitpek.

Qysqasha sıýjetine toqtalar bolsaq, bazarda júk tasyp, kúnin kórip júrgen jas jigit ara-tura jasyryn tóbeles alańdaryna shyǵyp júredi. Kezekti onyń tóbelesin kórip, darynyn baıqaǵan bir menedjer ony qol astyna alady. Mańyzdy kezdesýlerdiń biriniń qarsańynda aýyr jaraqat alǵan bas keıipkerge birqatar qaýipti ota jasalady. Osylaısha shym-shytyryq órbigen fılm sońynda ol sportta zor tabysqa jetip, mahabatta da joly bolady.