Qazaq boksshysy Tokıoda álem chempıony tıtýlyna talasady

NUR-SULTAN.QazAqparat - Jeńil salmaqta (50.8 kg) judyryqtasatyn ulty qazaq qytaılyq kásipqoı boksshy Ulan Tóleǵazyuly (13-3-1,6 KO) jyl sońynda Japonııa astanasy Tokıo qalasynda álem chempıony tıtýly úshin aıqasady, dep habarlaıdy QazAqparat.

Dúnıejúzilik boks uıymy (WBO) resmı saıtyndaǵy aqparatqa sáıkes, qazaq boksshysy 31 jeltoqsan kúni WBO tujyrymynyń úsh salmaq dárejesi boıynsha álem chemıony Koseı Tanakamen (14-0,8KO) judyryqtasady. Tokıo qalasynda ótetin jekpe-jekte japondyq boksshy jeńil salmaqta WBO tujyrymynyń álem chempıony tıtýlyn úshinshi ret qorǵamaq.

Aıta keteıik, Ulan Tóleǵazyuly jeńil salmaqta úsh birdeı boks uıymynyń chempıondyq tıtýldaryn ıelendi. Buǵan deıingi jekpe-jekterinde ol WBC tujyrymynyń kúmis belbeýin (WBC Silver Flyweight Title), WBO tujyrymy boıynsha Azııa-Tynyq muhıt chempıony (WBO Asia Pacific Flyweight Title) jáne WBA tujyrymy boıynsha halyqaralyq chempıon (WBA International Flyweight Title) belbeýlerin jeńip alǵan bolatyn. Ol osy salmaqtaǵy BoxRec álemdik reıtınginde 9-orynda tur.