Qazaq boksshysy meksıkalyq juldyzdy jekpe-jekke shaqyrdy

NUR-SULTAN. QazAqparat - Qazaqstandyq kásipqoı boksshy Musa Tursynǵalıev meksıkalyq tanymal boksshy Raıan Garsııany (18-0, 15KO) aıqasqa shaqyrdy. Bul týraly VKontakte áleýmettik jelisindegi «Qazaqstannyń kásipqoı boksy» paraqshasynda jazyldy, dep habarlaıdy QazAqparat.

Jartylaı jeńil salmaqtaǵy WBA NABA chempıony, 24 jastaǵy Musa Tursynǵalıev meksıkalyq juldyzben aıqasýǵa bel sheship otyr.

«Raıan qalaısyń?! Men seniń jaqsy boksshy ekenińdi bilemin jáne seni syılaıtynymdy bildirgim keledi. Biraq, úzdikterdiń úzdigi bolǵyń kelse, myqtymen sharshy alańda kezdesýiń kerek. Men senimen aıqasqym keledi. Qanekeı shyǵaıyq. Boks fanattaryna naǵyz mereke syılaıyq! Qazaq boksy men meksıkalyq boks, qazaq stıli men meksıkalyq stıl, qazaq qany men meksıkalyq qan - myqtysy anyqtalsyn! Sen «ıá» deseń boldy, jekpe-jekti uıymdastyramyz. Jaýabyńdy kútemin. Qurmetpen, Musa», - dedi Tursynǵalıev óziniń vıdeojoldaýynda.

Tursynǵalıev sońǵy jekpe-jegin osy jyldyń naýryzynda Gollıvýdta ótkizip, amerıkalyq Vınsent Djennıgsti tóreshilerdiń bir aýyzdan qabyldaǵan sheshimimen jeńgen edi. Osylaısha ol profı-rıngtegi toǵyzynshy jeńisine qol jetkizdi. Olardyń altaýyn merziminen buryn aıaqtady.