Qazaq boksshysy Qytaıdyń ulttyq quramasynyń tarap ketýine sebepshi boldy
ASTANA. QazAqparat - Qytaıdaǵy qazaq boksshylarynyń ádiletsiz jeńilisinen keıin, Qytaıdyń bokstan ulttyq quramasy tarap ketti, dep habarlaıdy QazAqparat tilshisi.
Buǵan deıin habarlaǵanymyzdaı, 75 kg salmaqtaǵy boksshy Qytaıdaǵy qandasymyz Toqtarbek Tańlathanuly XIII kezekti jazǵy jalpy qytaılyq spartakıadasynyń fınalyna shyǵyp, aqtyq básekede Hýbeı provıntsııasynyń sportshysy Ven Inhańnan tóreshiler sheshimimen jeńilip qalǵan bolatyn. 
Alaıda, sportshynyń bapkerleri narazylyq tanytyp, shaǵym túsirgen. Qortyndysynda tóreshiler sheshimi ózgerip, qandasymyz fınalǵa joldama alǵan.
Sonymen qatar, 64 kg salmaqta bokstasqan Erdáýlet Meırambekuly shırek-fınalda XII kezekti spartakıada chempıony Van Gańmen kezdesip, Erdáýlet aıqyn basymdylyq kórsetse de tóreshiler 4:1 esebimen jeńisti qarsylasyna berdi.
Jarystan keıin, tóreshiniń sheshimine qytaılyq boks jankúıerleri óz narazylyq bildirip, jarys qortyndysyn qaıta qaraýdy talap etti.
Qytaı Memlekettik Sport bas basqarmasy 8 qyrkúıek kúni Qytaıdyń bokstan ulttyq quramasynyń taratylǵany týraly málimdeme jasady. Málimdemede, osy eki jarysta ádiletsiz sheshim jasaǵan barlyq tóreshiler jáne jaýapty basshylardyń qyzmeti toqtatylǵany týraly aıtylǵan.
Aıta keteıik, Shyńjań-Uıǵyr avtonomııalyq ólkesi Qytaıdyń eń úlken boks bazasy. Qazaqstandyq tanymal kásipqoı boksshy Qanat Islam osy óńirdiń qazaqtar shoǵyrlanǵan Altaı aımaǵy Qaba aýdanynda dúnıege kelip, jastaıynan Shyńjań boks quramasy sapynda óner kórsetken. Búl kúnde Shyńjań boksshylary Qytaı atynan halyqaralyq básekelerde jáne Olımpıada oıyndarynda top jaryp keledi.
