Qazaq boksshysy qarsylasyn nokaýtpen jeńdi
ASTANA. QpazAqparat - Qazaqtyń kásipqoı boksshysy Aıdos Erbosynuly besinshi kezdesýin nokaýtpen jeńdi, dep habarlaıdy QazAqparat tilshisi.
Jerlesimiz Nıý-Djersı shtatynda ótken kezekti aıqasynda jergilikti boksshy Rıarýs Dadleımen (5-1-1, 2KO) judyryqtasyp, ekinshi raýndta tehnıkalyq nokaýtpen jeńiske jetti. Negizi jekpe-jek 6 raýndqa josparlanǵan bolatyn.
Aıta keteıik, Aıdos Erbosynuly osy ýaqytqa deıin kásipqoı boks sharshy alańynda 4 kezdesý ótkizip, barlyǵynda da jeńiske jetti. Onyń ekeýin Ýkraınada, qalǵan eki jekpe-jekti óz elimizde ótkizgen bolatyn. Al búgingi aıqasy AQSh aýmaǵyndaǵy ótkizgen alǵashqy jekpe-jegi. Talantty qazaq boksshysy kásipqoı boksta 72,6 kelige deıingi salmaqta óner kórsetedi.
